भांगरभूंय | प्रतिनिधी
भारतीय दंड संहितेचे सुवातेर भारतीय न्याय संहिता प्रजासत्ताक दिसा पयलीं जातली लागू
नवी दिल्ली, खबरां संस्था ः ब्रिटीश काळांतल्या भारतीय दंड संहितेचे (IPC) सुवातेर भारतीय न्याय संहिता (BNS) ह्या म्हयन्यांत प्रजासत्ताक दिसा (26 जानेवारी) पयलीं लागू जातली.
अधिसुचोवणी जारी जाले उपरांत उण्या गंभीर गुन्यांवांक लागून बंदखणींत आशिल्ल्या सुमार 82 हजार कैद्यांक सोडपाची प्रक्रिया सुरू जातली. होळये पयलीं ते बंदखणींतल्यान भायर सरपाची शक्यताय आसा.
कैद्यांक सोडपाची प्रक्रिया सुरू करपा खातीर प्रशिक्षीत बंदखण अधिकारी, पुलीस दळ आनी वकिलांक प्रशिक्षण दितले अशें गृह मंत्रालयाच्या एका वरिश्ठ अधिकाऱ्यान सांगलें. 3000 प्रशिक्षकांक प्रशिक्षण दिलां. आतां नव्या कायद्या प्रमाण उरिल्ल्यांक प्रशिक्षण दितले. तशेंच जामीनाचे पयशे नाशिल्ल्या कैद्यां खातीर सरकारान खास निधीची वेवस्था केल्या. अशा कैद्यांची जामीनाची रक्कम केंद्र आनी राज्य सरकार एकठांय करतले.
बंदखणींतल्या अर्द कैद्यांचेर गंभीर नाशिल्ल्या गुन्यांवांचे आरोप
देशांतल्या बंदखणींत साडेपांच लाख कैदी आसात अशी म्हायती गृह मंत्रालयाच्या सुत्रांनी दिल्या. वट्ट कैद्यांतले सुमार अर्दे कैदी गंभीर गुन्यांवांचे कैदी आसात. गैर गंभीर गुन्यांवांनी खटलो चलोवपी लोकांचो आंकडो 2 लाख आसा. तातूंतले चडशे ख्यास्ती परस चड काळ बंदखणींत आसात.
सुनावणी ऑनलायन जातली देखून पुलिसांचो वेळ वाचतलो
खटल्या खाला आशिल्ल्या कैद्यांक जामीन आनी सुटके खातीर स्वता न्यायालयांत वचचें पडचें ना. तांकां बंदखणीतल्यानच ऑनलायन पध्दतीन कोर्टात हाजीर जावचे पडटलें. जामीन मेळटाच तांची सुटका जातली.
आतां मेरेन जामीन मेळोवपा खातीर हाजीर रावपाचे आनी जामीन मेळना जाल्यार तांका बंदखणींत व्हरपाचे प्रक्रियेंत पुलीस कर्मचारी दीसभर व्यस्त उरतालें अशें गृह मंत्रालयाच्या अधिकाऱ्यांनी सांगलें. देखून पुलिसांचो वेळ वाचतलो आनी पुलीस दळाक हेर कामां करपाक वेळ मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
