भांगरभूंय | प्रतिनिधी
भारतीय नौदळाक संवसारांतल्या सगळ्यांत बळिश्ट नौदळांत मेजतात. आयज नौदळ दीस. ह्या दिसा निमतान विशेश लेख.
आयज भारतीय नौदळ दीस. दर वर्सा 4 डिसेंबराक तो मनयतात. ताचे आदींचें पुराय सप्तक देशभरांत नौदळ सप्तक मनयतात. 4 डिसेंबराक हो दीस कित्याक मनयतात, तें जाणून घेवया.
1971 वर्साचे सुरवेक भारत आनी पाकिस्तानांत खर तणाव आशिल्लो. तेन्नाच्या उदेंत पाकिस्तानांतल्यान पाकिस्तानाचो हवाई दळ भारतीय प्रदेशांत सतत घुसखोरी करतालो. भारतांतल्यान परत परत शिटकावणी मेळ्ळी तरी पाकिस्तान आपलीं दादागिरी सोडून दिवपाक तयार नाशिल्लो. 1971 च्या एप्रिल म्हयन्याच्या सुमाराक झुजा सारकी परिस्थिती निर्माण जाली. हे संदर्भांत प्रधानमंत्री इंदिरा गांधीन सशस्त्र दळाच्या अधिकाऱ्यांची बसका आपयली, तातूंत मंत्रीमंडळांतले सगळे वांगडी हाजीर आशिल्ले.
सध्याची परिस्थिती आनी हंगाम आमकां अनुकूल नाशिल्ल्यान सध्या आमकां झुज परवडना अशें लश्करी मुखेली सॅम माणेकशाॅन हे बसकेंत स्पश्ट केलें. झुजाक नोव्हेंबर मेरेन वाट पळोवची पडटली. नोव्हेंबर मेरेन सैन्याची जुळवाजुळव करपाक मेळटली हाचीय खात्री दिवपाक ते विसरले नात. इंदिरा गांधीचें मत प्रत्यक्षांत एप्रिलांतूच झूज जावंक जाय, पूण लश्करी मुखेल्यान परिस्थिती सांगतकच प्रधानमंत्री आनी मंत्रीमंडळान नोव्हेंबर मेरेन वाट पळोवपाचें थारायलें. देखून पाकिस्तानान अशें वागपाक सुरवात केली की आमी कितेंय केलें तरी भारत आमकां जाप दिवंक शकचो ना.
3 डिसेंबराक तांणी उदेंत आनी अस्तंत पाकिस्तानांतल्यान भारतीय शिमेचेर व्हड हल्लो केलो. त्याच वेळार पाकिस्तानान आयएनएस विक्रांत ही भारतीय विमानवाहू बोट दर्याच्या तळाक बुडोवपाची येवजण आंखली. पाकिस्तानाची ही येवजण भारतीय नौदळान लक्षांत येतकच भारतीय नौदळान चुकीचो संदेश दिवन पीएनएस गाझीक भलतीच वाट दाखयली. उपरांत तिचेर हल्लो केलो.गाझी ही पाकिस्तानी पाणबुडी भारतीय नौदळाच्या हल्ल्यांत बुडली. पाकिस्तानाच्या नौदळाची सगळ्यांत बळिश्ट पाणबुडी गाझी दर्याच्या तळाक पावतकच पाकिस्तानाक धपको बसलो. गाझी पाणबुडी बुडोवन पाकिस्तानी नौदळाची फाट मोडून उडयले उपरांत आयएनएस विक्रांतान बंगालच्या उपसागरांत आपलो शेक जमयलो.
आयएनएस विक्रांताचे धांवपट्टेचो उपेग करून नौदळाच्या झुजारी विमानांनी हल्लो केलो आनी पाकिस्तानाक उदेंते वटेन तकली लेगीत वयर काडूंक दिली ना. हें चालू आसतना अस्तंत मुख्यालयाच्या नौदळाच्या जवानांनी एक धाडसी येवजण आंखली आनी ल्हान बोटींच्या आदारान गुप्तपणान पाकिस्तानाच्या दर्यावेल्या वाठारांत प्रवेश करून कराची बंदराचेरूच हल्लो केलो. पाकिस्तानी झुजारी बोटी, पाणबुडयो हांचेर अचकीत जाल्ल्या ह्या हल्ल्याक लागून पाकिस्तानी नौदलाची कंबरूच मोडली. तांणी 10 दिसांनी शरणागती पत्करली. कराची बंदराचेर थेट हल्लो जातलो, हाची पाकिस्तान नौदळाक कल्पना पसून नाशिल्ली. 3 आनी 4 डिसेंबराच्या मध्यान रातीं भारतीय नौदळाच्या ह्या हल्ल्यान पाकिस्तानाक हारयलो. धा दिसां भितर पाकिस्तान शरण आयलो.
नौदळाच्या ह्या पराक्रमाची याद करून 4 डिसेंबर हो नौदळ दीस म्हणून मनयतात. ते उपरांत संवसारांत भारतीय नौदळाचो शेक वाडलो. अरबी दर्या, बंगालच्या खाडी आनी दक्षिण म्हासागरांत भारतीय नौदळाची स्थापणूक जाली. आयज भारतीय नौदळाक संवसारांतली सगळ्यांत बळिश्ट नौदळ म्हूण वळखतात. आयज भारतीय नौदळ हें संवसारांतलें पांचवें व्हडलें नौदळ आसा. भारतीय नौदळांत वट्ट 55 झुजारी जहाजां आनी 58 हजार 350 सैनिक आसात. भारता कडेन 9 विध्वंसक, 15 पाणबुडयो, एक अणु हल्लो करपी पाणबुडी, 14 परंपरीक पाणबुडी अशीं आधुनीक शस्त्रां आसात देखून भारतीय नौदळाक संवसारांतल्या सगळ्यांत बळिश्ट नौदळांत मेजतात. भारतीय नौदळाक आयच्या नौदळ दिसाचीं परबीं!
– श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
