भांगरभूंय | प्रतिनिधी
पणजी: भारतीय नौदळान आधुनिकीकरण आनी तांक वाडोवपाच्या यत्नांचें नवें पावल मारीत १७ डिसेंबर २०२५ दिसा गोंयच्या दाबोळेच्या आयएनएस हंसा तळार दुसरे एमएच ६० आर हेलिकॉप्टर स्क्वॉड्रन आयएनएएस ३३५ ‘ऑस्प्रिज्’ ताफ्यांत दाखल केलें . नौदळ मुखेली ऍडमिरल दिनेश के. त्रिपाठी ह्या वेळार हाजीर आशिल्ले. ह्यान पयलीं मार्च २०२४ वर्सा केरळांतल्या कोची हांगा पयले एमएच- ६०आर हेलिकॉप्टर नौदळा खातीर तैनात जाले.
नौदळाच्या ह्या युनिटाक औपचारिक मान्यताय दिवपी अधिकृत आदेशपत्र कमांडिंग ऑफिसर (डिझाईन ) कॅप्टन धिरेन्दर बिश्ट हांणी वाचून दाखयलें. उपरांत नौदळ मुखेल्यांनी, पश्चीम नौदळ कमांडचे मुखेल ध्वज अधिकारी व्हायस ऍडमिरल कृष्णा स्वामीनाथन हांचे हाजेरींत तखट्याचें अनावरण केलें.
बहुपयोगी एमएच-६०आर हेलिकॉप्टरचो पश्चीम दर्यादेगेर नौदळाच्या ताफ्यांत आसपाव हो म्हत्वाचो टप्पो, अशें ऍडमिरल त्रिपाठी हांणी म्हणलें. २०२५ हें वर्स विशेश आसा, कारण ह्याच वर्सा फ्लीट एअर आर्म स्थापन करपाक केंद्र सरकारान मान्यताय दिल्ल्याक ७५ वर्सां पुराय जालीं. त्या निर्णयाक लागून नौदळ हवाई दळाक नवे फॅन मेळ्ळे आनी नौदळाची भोव आयामी शक्त विकसीत जाली.
विमानांच्या कसरतींचें प्रदर्शन आनी नौकांच्या ताफ्याची परंपरीक सलामी हें इतिहासीक दिसाच्या कार्यावळीचें आकर्शण थारलें.
व्हाइस ऍडमिरल राहुल विलास गोखले, पश्चिम नौदळ विभागाचे चीफ ऑफ स्टाफ रिअर ऍडमिरल अजय डी थिओफिलस, गोंय नौदळ क्षेत्राचे फ्लॅग ऑफिसर कमांडिंग आनी नौदळ विमानउड्डाण विभागाचे फ्लॅग ऑफिसर ऍडमिरल करमबीर सिंग (निवृत्त), आदले नौदळ मुखेली, नौदळ अधिकारी, निवृत्त कर्मचारी तशेंच हेर मानेस्त हे कार्यावळीक हाजीर आशिल्ले.
ह्या हॅलिकॉप्टर्सांक लागून भारतीय नौदळाच्या पश्चिम सागरी क्षेत्रातल्या भितरल्या हवाई सामर्थ्यांत मात्शी वाड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
