भांगरभूंय | प्रतिनिधी
खबरां संस्था ः भारतीय नागरिकांक परदेशांत मरण येवपाच्यो घडणुको बऱ्योच वाडत आसात. आतां परत एक फावट कॅनडांत भारतीय तरणाट्याची हत्या जाल्या. हालींच ताका कॅनेडियन परमनंट रेसिडेंट (PR) दर्जो मेळिल्लो.
पंजाबांतल्या लुधियानाच्या एका मूळ भारतीय मनशाक शुक्रारा कॅनडाच्या सरे शारांत फारपेट करुन जिवेशीं मारलो. ताचें नांव युवराज गोयल (28) अशें आसा. युवराज 2019 वर्सा विद्यार्थी व्हिसा घेवन कॅनडात आयिल्लो आनी हालींच कॅनडाचो कायम नागरीक जाल्लो.
युवराज सेल्स एक्झिक्युटिव्ह म्हणून काम करतालो. ताचो बापूय राजेश गोयल लांकडाचो वेवसाय करता, जाल्यार आवय शकुन गोयल गृहिणी आसा. युवराजाचो कसलोच गुन्यांवकारी रेकॉर्ड नोंद ना आनी ताच्या हत्ये फाटल्या कारणाची चवकशी सुरू आसा अशें रॉयल कॅनेडियन पुलिसांनी सांगलें.
7 जून दिसा सकाळीं 8.46 वरांचेर ही घडणूक घडली. ब्रिटीश कोलंबियाच्या 164 स्ट्रीटच्या 900 ब्लॉकांत फारपेट जाल्ल्याचो फोन सरेच्या पुलिसांक आयलो. पुलीस घडणुक सुवातेर पावले तेन्ना तांका युवराज मेल्लो मेळ्ळो. पुलिसांनी चार दुबावितांक ताब्यांत घेतल्यात. दुबावित मनवीर बसराम (23), साहिब बसरा (20), सरेचो हरकिरत झुट्टी (23) आनी ओंटारियोचो केलॉन फ्रँकोइस (20) हांचेर शेनवारा ह्या खुनाचो आरोप दवरला. ह्या प्रकरणांत युवराजाचेर फारपेट जाला, पूण ताचे हत्येचें कारण अजून स्पश्ट जावंक ना. पुलिसांनी फुडलो तपास सुरु केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
