भांगरभूंय | प्रतिनिधी
पणजी : भारतीय तटरक्षक दळान गोंयच्या नुस्तेंमारी बोटींतल्या ३१ जाणांक कर्नाटकांत वाटयले. नुस्तेंमारी बोटीचें स्टीअर्गी गियर इबाडिल्ल्यान बोट खोल दर्यांत ११ दीस आडकून उरली आनी व्हांवून वचपाक लागली. उपरांत तटरक्षक दळान खोल दर्यांत आडकल्ले हे बोटींतल्यान ३१ जाणांक होन्नावर दर्यादेगेर सुरक्षितपणान हाडले.
हे नुस्तेंमारी बोटीचें नांव आयएफबी सेंट अँटोन अशें आसा. हे विशीं जारी केल्ल्या सिद्धीपत्रका प्रमाण, २४ ऑक्टोबराक गोंयचे दर्यांत आडकल्ले बोटीची म्हायती मेळ्ळे उपरांत, भारतीय तटरक्षक दळान (कर्नाटक) सोद आनी बचाव मोहीम सुरू केली. नुस्तेंमारी बोट निमाणी न्यू मंगळुरू सावन सुमार १०० नॉटिकल मैल अंतराचेर नोंद जाल्ली. आयसीजीएस कस्तुरबा गांधी आनी कोचीच्यान तटरक्षक दळाच्या डॉर्नियर विमानाक बेपत्ता आशिल्ले बोटीचो सोद घेवपाक धाडलें. इंटिग्रेटेड ऑपरेशन्स सेंटर आनी रिअल टायम हवामान डेटाचो वापर करून, तटरक्षक दळान आडकल्ले बोटीची सुवात सोदून काडली आनी अपडेट केल्ले सुवातेर निर्देशीत केलें, अशें प्रसिद्धीपत्रकांत म्हणलां.
आयसीजीन म्हणलें, २५ ऑक्टोबराक डॉर्नियर विमानान मासेमारी नौका येसस्वीपणान पळयली, जाका लागून आयसीजीएस कस्तुरबा गांधी घडणुके सुवातेर पावलें आनी लॉजिस्टिक्स सपोर्ट, लुकसाण मुल्यांकन आनी स्टीअरिंग सिस्टमचे सायटीचेर दुरुस्ती आनी आयएफबीची वॉटरटायट अखंडता सुनिश्चीत करपा वांगडा म्हत्वाची मजत करपाक शकले.
बोट स्थिर केले उपरांत, तटरक्षक दळाचे बोटीन आयएफबी सेंट आंतोन -१ क होन्नावर नुस्तेंमारी बंदरांत सुरक्षितपणान ओडपा खातीर दुसर्या आयएफबी कडेन दिलें. भारतीय तटरक्षक दळान राबयिल्ले हे येसस्वी मोहिमेक लागून बोटीचेर आशिल्ल्या गोंयच्या ३१ नुस्तेंमार्याक वाटावपाक शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
