भारतीय तटरक्षक दळाच्या अधिकाऱ्यांचो राष्ट्रपतीं हस्तुकीं भोवमान

भांगरभूंय | प्रतिनिधी

वास्को: भारतीय तटरक्षक दळाच्या अस्तंत विभागाच्या चार अधिकारी आनी एक नावीक हांकां तांची उत्कृश्ठ सेवा आनी शौर्य कामगिरी खातीर राष्ट्रपती द्रौपदी मुर्मू हांचे हस्तुकीं प्रतिश्ठीत पदकां भेटोवन भोवमानीत केले.
भारतीय तटरक्षक दळाचे अतिरिक्त महासंचालक आनी पश्‍चीम दर्यादेगचे कमांडर अनिल कुमार हरबोला हांका तांचे खास सेवे खातीर तटरक्षक पदक भेटयलें. अनिलकुमार हरबोला हे फाटलीं ३६ वर्सां भारतीय तटरक्षक दळांत सेवा दितात. १९९९ त भारतीय तटरक्षक दळाच्या ताराबाई जहाजाचें नेतृत्व करतना दर्याच्या चाच्यांच्यो एक हजार बोटी धरिल्ल्यो. तांचे हे कामगिरी खातीर तांकां पदक दिवन भोवमानीत केले. उपमहानिरीक्षक अतुल जोशी हे फाटलीं २८ वर्सां तटरक्षक दळचे सेवेंत आसात. तोखणाय करपा सारके सेवे मजगतीं दिल्ल्या म्हत्वाच्या योगदानाची दखल घेवन तांकां तटरक्षक पदकान भोवमानीत केले.
कमांडर अंशुमन रतुरी, सहाय्यक कमांडर मनीष सिंग, नाविक (खलाशी) समीर रंजन हांकांय तांच्या शौर्या खातीर तटरक्षक पदक भेटोवन भोवमानीत केलें. गुजरात, दमण आनी दीव, महाराष्ट्र, गोंय, कर्नाटक, केरळ ह्या राज्यांचेर अधिकाक्षेत्र आशिल्ल्या तटरक्षक दळाच्या पश्‍चीम सीबोर्डाक तांचे कामगिरीचो अभिमान आसा. पांच पुरस्कार मेळप ही सीबोर्डा खातीर प्रतिश्ठेची गजाल.