भारतीय जनता पार्टी एक कुटूंब

भांगरभूंय | प्रतिनिधी

मुख्यमंत्री: वेळग्यां मुखेल कार्यकर्त्यांचे हाजेरींत टिफीन बसका उमेदीन

दिवचल: भारतीय जनता पार्टी हें एक कुटूंब आनी एकामेकांच्या सुखांत वांटो घेवन, एकामेकांचे प्रस्न समजून घेवन, ते सोडोवन कुटुंबाक सूख आनी समृध्दी हाडप हो ताचो हेत. ह्याच हेतान भाजपाच्या राष्ट्रीय धोरणाचो एक भाग आनी प्रधानमंत्री नरेंद्र मोदी हांचे संकल्पनेंतल्यान टिफीन बसकेचें आयोजन केल्ल्याची म्हायती मुख्यमंत्री डॉ. प्रमोद सावंत हांणी दिली. 

वेळगेंच्या श्री सांतेरी मंदिरांत मुखेल कार्यकर्त्यांचे हाजेरींत टिफीन बसकेचें आयोजन केल्लें. ह्या वेळार मंडळ अध्यक्ष  गोपाळ सुर्लकार, सरचिटणीस कालिदास  गांवस, सगळ्या मोर्चाचे प्रतिनिधी, बूथ समिती, नगराध्यक्ष रश्मी देसाय, उपनगराध्यक्ष आनंद काणेकार, नगरसेवक, सातूय पंचायतींचे सरपंच, उपसरपंच, पंच वांगडी तशेंच मुखेल कार्यकर्ते हाजीर आशिल्ले.  

भाजप परिवार बरोच व्हड आशिल्ल्यान तो आनीक घटमूट करपाचेर आमी भर दितले. लोकांक, कार्यकर्त्यांक वेंचणुके पुरते मर्यादीत दवरिनासतना लोकांच्या संपर्कांत रावप, तांचे प्रस्न सोडोवप, तांचेे विचार समजून घेवप, तांकां मार्गदर्शन करप, एकवट, विश्वासाची भावना वाडोवप होच हे टिफीन बसकेचो मूळ हेतू आशिल्ल्याचें प्रधानमंत्री मोदी हांणी सांगलां अशे मुख्यमंत्री डॉ. प्रमोद सावंत हांणी म्हणलें. 

हे टिफीन बसकेंत मुख्यमंत्री डॉ. प्रमोद सावंत हांणी स्वता टिफीन हाडिल्लें. दरेका कार्यकर्त्यांनी एकेच कडेन बसून, हाडिल्लें टिफीन एका मेकाक वाटून एकवटान टिफिनाचो आस्वाद घेतलो आनी आपुलकी,  मोग, लागसारपण, आदर, इश्टागतीची भावना दाखोवन दिली. 

ह्या वेळार मुख्यमंत्री डॉ. सावंत हांणी हाजीर आशिल्ले कार्यकर्ते हांचे कडेन सुमार दोन वरां उपलब्ध रावन तांचे प्रस्न, सुचवण्यो जाणून घेतल्यो. तांच्यो समस्याय सोडोवपा खातीर फाटपुरवण केली. 

दर तीन म्हयन्यांत टिफीन बसका विवीध सुवातांचेर आयोजीत करून भाजप परिवार आनीक घटमूट करपा खातीर कार्य सेवा दितले, अशें येवकाराच्या उलोवपांत गोपाळ सुर्लकर हांणी सांगलें.

समंता कामत हांणी सगळ्यांचे उपकार मानले. संतोष मळीक हांणी कार्यावळीचो हेत सांगलो. 

वेळगें हांगा टिफीन बसकेंत मुख्यमंत्री डॉ. प्रमोद सावंत हांणी मुखेल कार्यकर्त्यां वांगडा अल्पोपहाराचो आस्वाद घेतलो.तांचे कडेन मुख्यमंत्र्यान गजालीय केल्यो.