भांगरभूंय | प्रतिनिधी
खबरां संस्था
एजबॅस्टनः राष्ट्रकुल खेळां सर्तींत आयतारा जाल्ले बायलांचे टी-20 क्रिकेट मॅचींत भारताच्या चलयांनी पाकिस्तानाक 8 विकेटींनी हारयलें. भारताची ओपनर स्मृती मंधानान धमाकेदार अर्दे शेंकडो (63) करून भारताक सहजतायेन जैतिवंत केलें. पावसाक लागून ही मॅच दरेकी 18 ओव्हरींची करची पडली. भारताचें हे सर्तींतलें हें पयलेंच जैत आसा.
पाकिस्तानान भारताक जैता खातीर 18 ओव्हरींत 100 धांवड्यांचें लक्ष्य दिल्लें. भारतान तें दोन गडी वोगडावन 11.4 ओव्हरींत पुराय केलें. भारताची ओपनर शफाली वर्मा आनी स्मृती मंधानान डावाची सुरवात आक्रमक खेळान केली. स्मृती मंधानाची भारताच्या जैतांत मोलाची भूमिका आशिल्ली. ताणे 42 बॉलांत 8 चौके आनी 3 सक्यांनी नाबाद 63 धांवड्यांची खेळी केली.
भारत आड पाकिस्तान अशी मॅच आसतकूच दोनूय पंगडांच्या खेळगड्यांचेर व्हड चेंपण आसता. मात भारतीय चलयांनी हें चेंपण कुशीक दवोरून खेळ केलो. 12वे ओव्हरींत स्मृतींन व्हडलो सको हुबोवन भारताच्या जैताचेर म्होर लायली. ही मॅच जिखून भारतान सर्तींतलें आपलें आव्हान कायम दवोरलां. भारताची फुडली मॅच बार्बाडोसा कडेन जातली.
पाकिस्तानाची कॅप्टन बिसमाह मारूफान टॉस जिखून पयलीं बॅटींग करपाचो निर्णय घेतिल्लो. मात भारतीय बॉलरांनीत ताका ह्या निर्णयाचेर पश्चाताप करपाची पाळी हाडली. थारावीक अंतरान पाकिस्तानाच्यो खेळगडी बाद जायत गेले आनी 99 धांवड्यांत तांचो डाव सोपलो. पाकिस्ताना वतीन मुनिबा अलीन सगल्यांत चड 32 धांवड्यो केल्यो. भारता वतीन राधा यादव आनी स्नेह राणान दरेकी दोन विकेटी घेतल्यो. पाकिस्तानाच्यो तीन खेळगडी रनआवट जाल्यो.
भारत आनी पाकिस्तान ह्या पारंपरीक प्रतिस्पर्ध्यांक राष्ट्रकुल सर्तेची बरी सुरवात करपाक अपेश आयलें. भारतान संवसारीक जैतिवंत ऑस्ट्रेलिये कडल्यान जाल्यार पाकिस्तानान बार्बोडोसा कडल्यान हार घेतल्या. भारतीय पंगडांत कांय म्हयन्यां पयलीं जाल्ले वन-डेत संवसारीक करंड सर्तींत पाकिस्तानाक हारयल्लें. दोनूय पंगडां मदीं जाल्ल्या 12 टी-20 मॅचींत भारतान 10 मॅचींनी जैत मेळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
