भांगरभूंय | प्रतिनिधी
आदल्या साहित्याक नाक मुरडपाची संवय शेंकड्यांनी लोकांक आसा. हाका ना म्हणलें तरी इंग्लीस मानसिकताय जापसालदार आसपाक शकता. आदल्या साहित्यांत मोल शिक्षणाचें मोलादीक गिन्यान आसलें, हें आमी न्हयकारपाक शकनात. दोनशे, चारशें वर्सां पयलींचें साहित्य मूळ संस्कृत भाशेंत आसा. तें संवसारांतल्या बऱ्याच भाशांनी अणकारीत जाला. मात त्या साहित्यांत नेमकें कितें बरयलां ताचो खरो अर्थ सगलेच सांगपाक शकतले अशें ना. देवदत्त पटनायक, सुरेंद्र तिवारी सारके वेंचिक लोक आसात, जे अभ्यास करून उलयतात. बरयतात. म्हाका दिसता प्रत्येकान संस्कृत भाशेचो, वेद, उपनिशद, गीता सारक्या भांडाराचो अभ्यास केलो जाल्यार म्हाका दिसता भारतीय म्हणल्यार कितें ताचो अर्थ तुमकां कळपाक शकतलो. ओपन पाठशाला हे संस्थेन तशी आॅनलायन वर्गाची तजवीज केल्या. ताचो इत्सुक लाव घेवपाक शकतात. वर्गाक पिराय, थारावीक शिक्षणाची गरज ना. तुमकां त्या विशयाची आवड मात आसपाक जाय.
भारतीय साहित्य भांडाराचो साक्षात्कार आमकां उसरां जाता. खंयच्या तरी व्याख्यानाक आमी वतात वा व्हिडियो पळयतात वा कोण तरी सांगता म्हूण ते पुस्तक वाचतात तेन्ना आमकां भारतीय साहित्याची गिरेस्तकाय कळटा. आपूण जावन शिकपी, वाचपी उणेच. राहुल डोळस हो इंजिनियर नोकरी करतालो. पगारुय भरपूर आशिल्लो. पूण लोकांक कडेन भासाभास करतना ताका आमच्या वेद, उपनिशदांत कितली गिरेस्तकाय आसा तें कळ्ळें. पूण हें वाचतलो जाल्यार संस्कृत येवपाक जाय म्हूण ताणें लोकांक ती शिकोवपाचें मनार घेतलें. ताका मुंबय विद्यापीठाची ह्या विशयांत भांगरा पदक मेळिल्लें बाय सरिता जोशी मेळ्ळें. ताकाय खोशी जाली. दोगांयनी संस्कृत भाशा शिकोवपाक सुरवात केली. ही गजाल 2016 तली. तांकां हेर जाणकारांचोय आदार आसलो. उपरांत तांणी बेगीन शिकोवन कशें जातलें हाचो विचार करून आपल्या शिकोवपांत बदल घडोवन हाडले.
आतां तांचे वेबसायटीचेर संस्कृत शिकवणेचे व्हिडियो पळोवपाक मेळटात. हो उपक्रम यशस्वी जाता म्हणसर राहुला कडेन कांय लोकांनी आग्रो धरलो. तुमी भारतीय साहित्य भांडार आॅनलायन कित्याक करिनात? वेद, उपनिशद, गीता सारके म्हान ग्रंथ आमकां अभ्यासपाक मेळ्ळ्यार बरें जातलें, अशें तांणी सांगलें. दुसऱ्याक सांगचे पयलीं आपूण ताचो अभ्यास केल्यार बरें अशें राहुलाक दिसलें. तांणी रोखडेच ताचे वर्ग सुरू केले. तांचे ओपन पाठशाळेचे वेबसायटीक भेट दिल्यार तुमकां संपर्क कोणाक करपाचो तें कळटलें. ते खातीर फोन आसा 96196 73006. तर वेबसायटीचो पत्तो आसा, openpathshala.
तुमी संस्कृत भाशा शिकश्यात जाल्यार तुमकां हें पोरणें साहित्य कळपाक कठीण, अडचणीचें वच्चें ना. चडशें साहित्य हेच भाशेंत आसा. मूळ वाचप आनी अणकारिल्लें वाचप हातूंत फरक आसता. आमचें पोरणें साहित्य संस्कृतांत आसा. पूण इंग्लीश भाशेचो प्रसार, प्रचार जाल्ल्यान ती भाशा फाटीं पडली. आतां नव्या शिक्षणीक धोरणांत आमच्या देशी भाशांत चड उर्बा, बळगें दिलां. हाका लागून संस्कृताक अच्छे दिन येवं शकतात. विज्ञानाचे बरेच विद्यार्थी आतां संस्कृत विशय घेतात. आॅनलायन शिकतात, तेन्ना तुमचो वेळ वाटावता. आसा थंय बसून तुमकां शिकपाक मेळटा. हो कोर्स मुंबय वचून करप सगल्यांकूच शक्य ना. खेरीज तुमकां जो आवडटा तो विशय तुमी घेवपाक शकतात. आमच्या गिरेस्त गिन्यानाचें भांडारुच राहुल डोळस ह्या विद्यार्थ्यान उक्तें केलां. भारताच्या गिन्यानाची वळख करपाक तो मुखार सरला. ताचो तुमी सगल्यांनी जरुर लाव घेवचो, अशें सांगीत दिसता.
आतां चलयोय विमो घेतल्यो
जीवन विम्यांत (एलआयसी) आतां मेरेन चलयो कार्यालयांतूच काम करतना दिसताल्यो. मात हाचे मुखार चलयो प्रतिनिधी विमा सखी म्हूण काम करतल्यो. हातूंत तांच्या हातांतल्यान समाजसेवा जातलीच पूण स्वयंपूर्ण जावपाकूय मेळटलें. आयज लोकांक विमो काडपाची सामकी गरज आसा. दरेकल्यान विविध येवजण्यांची म्हायती करून घेवंक जाय. हे येवजणेची घोशणा हालींच मुख्यमंत्री डाॅ. प्रमोद सावंत हांणी केली.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
