भांगरभूंय | प्रतिनिधी
खबरां संस्था
सिडनी : भारतीय क्रिकेट पंगड व्हड बदलाचे दिकेन चल्ला. हाचीच देख म्हूण तांणी सिडनी टॅस्टींत कॅप्टन रोहीत शर्माकूच भायर बसयलो. दुसरो सिनियर क्रिकेटर विराट कोहलीक संद दिल्या. मात, बॉर्डर – गावसकर ट्रॉफी सोंपल्या उपरांत ताचे बरोबर टॅस्ट क्रिकेट फुडारा विशीं निवड समिती चर्चा करपाची आसा म्हूण सुत्रां सांगतात.
बिरेस्तारा पत्रकार परिशदेंत पत्रकारांनी प्रशिक्षक गौतम गंभीराक रोहीत शर्मा खेळटलो काय म्हूण नेमको प्रस्न विचारिल्लो. ते वेळार गंभीरान खेळपट्टी पळोवन पंगड जाहीर करतले म्हूण जाप दिली. हे जापे वयल्यानूच रोहीत शर्मा खेळचोना म्हूण लागीलागीं स्पश्ट जाल्लें.
हरशीं कॅप्टन खेळटलो काय म्हूण केन्नाच प्रस्न येना. कॅप्टन हो पंगडाचो खांबो आसता. ताची सुवात पंगडांत निश्चीत आसता. अश्या वेळार तो खेळटलो काय ना हे खेळपट्टी पळोवन सांगतलें, ही जापूच कॉत्र वचपा सारकी आसा.
रोहीत शर्मा सिडनी टॅस्टींत ना म्हूण स्पश्ट जाताच क्रिकेट जगतांत व्हड बोवाळ पडलो. 2 म्हयन्यां पयलीं स्टार बॅट्समॅन आशिल्लो रोहीत शर्मा 5-6 मॅचींतल्या अपेसा उपरांत भारतीय क्रिकेट निवड समितीक नाका जालो. मेलबर्न टॅस्ट ताची निमणी टॅस्ट आशिल्ली अशीय चर्चा सुरू आसा.
दुसरो सिनियर खेळगडो विराट कोहलीचेरूय निवड समिती विचार करता. सुत्रां सांगता बॉर्डर – गावसकर ट्रॉफी सर्त सोंपल्या उपरांत निवड समिती ताचे बरोबर बसून ताच्या फुडारा विशीं चर्चा करतले. विराटान पयल्या टॅस्टींत शेंकडो मारिल्लो. मात, उपरांत ताची बॅट सापूच थंड पडली. रोहीता बरोबरच ताचें अपेसूय सामकेंच दोळ्यांत भरपाक लागलां. तो हालीं सगल्या मॅचींनी एकेच तरेन बाद जायत आसा. भारतीय पंगडांत सुवात मेळोवपा खातीर सर्त सुरू आसतना विराटाचे अपेस खरपणान दिश्टी पडपाक लागला. रोहीत आनी विराटाच्या अपेसाक लागून भारत वर्ल्ड टॅस्ट चँपियनशीपीचे फायनलींतल्यान लागींलागीं भायर पडल्या. दोन म्हयन्यां पयली वर्ल्ड टॅस्ट चँपियनशीप फायनलींत भारत सहज पावता अशें चित्र आशिल्लें. मात, न्युझिलॅण्डा आडचे माळे सावन भारत हरत आसा. ताका लागून भारताचे आव्हान सोंपिल्ल्यांत जमा आसा.
भारताचो तिसरो ज्येश्ठ खेळगडो रवींद्र जडेजा मात सध्या बदलाचे प्रक्रियेंत ना. जडेजा अश्टतासी. ताची फिल्डींग, बॉलींग बरी आसा. बॅटिंगेंतूय तो म्हत्वाचें योगदान दिता. ते खातीर फुडल्या टॅस्ट सायकलींत तो आसतलो. ना म्हणल्यार वर्सभर तरी तो आसतलो. हालींच रविचंद्रन आश्विन निवृत्त जाला. तेन्ना भारताक स्पिनींग विभागांत खांपो खेळगडो म्हूण जडेजा जाय. वॉशिंग्टन सुंदर तयार जाता. कुलदीप यादव स्पिनर, मात अश्टतासी म्हूण तसो तयार जाल्लो ना. अक्षर पटेल अश्टतासी म्हूण मुखार येता, मात बॉलिंगेंत मात्सो उणो पडटा. ह्यो गजाली सध्यातरी जडेजाक साल्वार करूंक पुरो. मात, सध्याची परिस्थिती पळयल्यार जडेजा वर्सभर तरी भारताचे टॅस्ट क्रिकेट येवजणेंत आसा.
टी-20 वर्ल्ड कप जिखल्या उपरांत रोहीत शर्मा, विराट कोहली आनी रवींद्र जडेजा हांणी टॅस्ट क्रिकेटींतल्यान निवृत्ती जाहीर केल्ली. टॅस्ट चँपियनशीप जिखून टॅस्ट क्रिकेटींतल्यान निवृत्ती जाहीर करपाचो रोहीत शर्माचो प्लान आशिल्लो, अशें सुत्रां सांगता. तशेंच रविचंद्रन आश्विनूय त्याच विचारांत आशिल्लो. मात, ऑस्ट्रेलियेंत पावना फुडें पयल्या मॅचींत वॉशिंग्टन सुंदराक मेळिल्ली संद आश्विनाक कॉत्र गेली. विदेशांत आश्विन नाजाल्यार जडेजा हांचे मदलो एकूच स्पिनर खेळयताले. मात, काल पयर आयिल्ल्या वॉशिंग्टनाक संद मेळ्ळी ते पळोवन आश्विनान निवृत्त जावपाचो विचार केलो. जडेजाक खेळयल्लो जाल्यार ताका व्हडलेंशें पडून वचचें नाशिल्लें. आश्विना फाटोफाट रोहीताची टॅस्ट क्रिकेटींतल्यान एक्झीट निश्चीत जाल्या. विराटूय तेच लायनींत आसा. मोहम्मद शामी दुखापतीक लागून भायर उरलां. सारको जालो तरी ताका संद मेळना. तेन्ना भारतीय क्रिकेट निवड समिती सिनियर खेळगड्यांचे फुडें विचार करपाक लागलां. भारतीय टॅस्ट पंगड युवा खेळगड्यांची आसतली, अशें चित्र दिसपाक लागलां.
तुजी आनीक गरज ना…
निवड समितीन रोहीताक स्पश्ट सांगलें : सुत्रां
टॅस्ट क्रिकेटींत तुजी आनीक गरज ना म्हूण भारतीय निवड समितीन रोहीत शर्माक स्पश्ट सांगलां म्हूण सुत्रां सांगता. फाटोफाट आयिल्ल्या अपेसाक लागून रोहीताक सिडनी टॅस्टींत सुवात मेळूंक ना. रोहीतान ऑस्ट्रेलियेंत येना फुडें आपली ओपनींग सुवात राहूलाक दितना स्वता सवे सुवातेर खेळ्ळो, मात थंय अपेस आयल्या उपरांत मेलबर्न टॅस्टींत तो ओपनर म्हूण खेळ्ळो. मात, अपेसान ताची फाट सोडूंक ना. निमाणें ताका पंगडांतली सुवात व्हगडावची पडली.
रोहीत स्वता जावन भायर, ताणें सांघीक भावना दाखयली : बुमराह
कॅप्टन रोहीत शर्मा स्वता जावन भायर रावला. ताणें पंगडा खातीर सांघीक भावना दाखयली, अशें भारताचो हंगामी कॅप्टन जसप्रीत बुमराह टॉस जिखल्या उपरांत उलयलो. पंगडाचो समतोल राखपा खातीर कॅप्टन स्वताच भायर रावता हाचे वयल्यान आमच्या पंगडांत कितलो एकचार आसा हें दिसून येतां अशेंय बुमराह उलयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
