भांगरभूंय | प्रतिनिधी
दक्षीण आफ्रिके आड टॅस्ट माळेंत भारताक व्हायट वॉश मेळ्ळो आनी जो-तो उठ सूट भारतीय क्रिकेटीच्या फुडारा विशीं, गौतम गंभीराच्या प्रशिक्षणा विशीं आनी कांय खेळगड्यां विशीं उलोवपाक लागला. सोशल मिडियाचेर जाल्यार प्रशिक्षक गौतम गंभीराच्या नांवांन शबै चल्ल्या.
भारतीय पंगडान पोरूं भारतांत न्युझिलॅण्डा आड टॅस्ट माळ 0-3 फरकान व्हगडायिल्ली. भारताक भारतांत हारोवप कठीण, अशें म्हणटाले. मात, न्युझिलॅण्डान ही करामत करून दाखयली. फाटोफाट ऑस्ट्रेलिया भोंवडेंर भारत 1-3 फरकान हारलो आनी टॅस्ट चँपियनशीप सर्तींतल्यान भारताचें पॅकअप जालें. ह्या दोन हारींची जबाबदारी भारताच्या वरिश्ठ खेळगड्यांचेर घालून मेकळेय जाले, अशें म्हणूं येता. ते फाटभुंयेर पयलीं रविचंद्रन आश्विन, उपरांत विराट कोहली आनी निमाणें कडेन कॅप्टन रोहित शर्मान टॅस्ट क्रिकेटींतल्यान निवृत्ती जाहीर केली.
हे तिगूय गेले उपरांत भारतीय पंगड ‘ट्रांजिशन’ काळांतल्यान वता, असो साक्षात्कार जालो. एकदम 3-3 खेळगड्यांक तांच्या आवडट्या क्रिकेट प्रकारांतल्यान निवृत्ती घेवप दिसले कशें? हाची जाप सगल्यांकूच खबर आसा. रविचंद्रन आश्विनाऌे सुवातेर वॉशिंग्टन सुंदर पावलो. हो बदल तसो सगल्यांक मानवलो. पूण आश्विन तो आश्विन. मॅच व्हिनर. मात, रोहित आनी विराटाची सुवात भरून काडपा खातीर भारतीय निवड समिती मुखार प्लॅनूच ना. तेन्ना ह्या दोगांक अचकीत निवृत्त जावपाक दिलेंच कशें. तांच्या ताकदीचे खेळगडे तयार जायसर रावपाक जाय आशिल्लें. शुभमन गिल हो भारताचो फुडार आसा हें बरोबर आसा. मात, गिलाक चेतेश्वर पुजाराचे सुवातेर तयार केल्लो. तेन्ना तो विराट वा रोहिताचो पर्याय जावपाकूच शकनाशिल्लो.
लोकेश राहुल जाल्यार फाटलीं 11 वर्सां धडपडटा. 67 टॅस्ट मॅची खेळ्ळा. मात, ताची बॅटींग सरासरी 35.87 आसा. जी रोहित आनी विराटा परस कितलीशीच उणीं आसा. तेन्ना टॅस्ट माळ हातांतल्यान वचपाक लागल्या ताचो दोश बरी सरासरी आशिल्ल्यांचेर घालून मेकळें जावपाचो प्रकारूच पचपा सारको ना. धडपडपी खेळगड्याच्या नेटार तुमी कशे जिखतले?
न्युझिलॅण्डा उपरांत दक्षीण आफ्रिकेन भारताक भारतांत व्हायटवॉश दिवपाचो पराक्रम केलो. हो पराक्रम करतना तांणी कसलीच दयामाया दाखोवंक ना. दक्षीण आफ्रिका अंदूंचे टॅस्ट चँपियन, तांणी चँपियना सारकोच खेळ केलो. तांचेरूय चँपियनशिपी वेळार टिका जाल्ली. सोंपो ड्रॉ घेवन फायनलींत पावले. आतां ऑस्ट्रेलिया तांकां चिड्डून माड्डून चँपियन जातलो, अशें म्हणटाले. मात, दक्षीण आफ्रिकेन सगल्यांक जाप दिली ती चँपियनशीप जोडून.
भारतीय पंगडान ताचे फुडें वचून दक्षीण आफ्रिकेच्या कॅप्टनाच्या नांवांचो अपभ्रंश केलो. त्या कॅप्टनान आपूण अजेय कॅप्टन कित्याक तें दाखोवन दितना भारताक पयले टॅस्टींत शॉक दिलो. आनी दुसरे टॅस्टींत भारताक एक डाव आनी चारश्यां परस मायज धांवड्यांनी हारोवन लजेक घालपी व्हायटवॉश दिलो. भारतीय पंगडान दुसरी टॅस्ट पांचव्या दिसा मेरेन व्हेली हीच व्हडली गजाल, अशें आतां नेटिजम्स म्हणपाक लागल्यात.
भारताचे हे हारी खातीर मुखेल प्रशिक्षक गौतम गंभीर आनी मुखेल निवडकर्तो अजीत आगरकर हांकां दोशी धरपाक लागल्यात. पंगडाचे हारीक प्रशिक्षकाक दोशी धरपाचो प्रकार भारतांत तसो नवो ना. एक ग्रेग चॅपेला वेळार आशिल्लो आतां गंभीरा वेळार. चॅपेलान तर भारताक सगल्याच प्रकारच्या क्रिकेटींतल्यान काबार केल्लो. गंभीराच्या काळांत रोहित, विराट, जडेजा नासतनाय टी-20 क्रिकेटींत भारत जबरदस्त प्रदर्शन करता. खेळगड्यांचे वेगळेवेगळे पर्याय तयार आसात. वन डे क्रिकेटींत रोहित-विराट-जडेजा आशिल्ल्यान तशेंच तांच्या वांगडा हार्दिक पांड्या, बुमरा आशिल्ल्यान हांगांय भंय ना. मात, टॅस्ट क्रिकेटींत भारताची वाट लागल्या. हाका गौतम गंभीर-आगरकराक जापसालदार धरप योग्य आसा?
सर्फराज खाना सारको रणजी आनी हेर प्रादेशीक क्रिकेट सर्ती गाजोवपी खेळगडो भायर आसा. इश्वरनाक भारतीय पंगडा वांगडा दवरून भायर काडलो. ताका भारताची जर्सी घालून बॅटींग करपाची संदूच दिवंक ना. हे दोन निर्णय गंभीर-आगरकरा आड वतात. मात, तांणी कितें तरी विचार करुनूच निर्णय घेतला आसतलो. तांकां भारतीय पंगड ऑलरावंड करपाचें आसतलें म्हूण थारावीक खेळगड्यांक संद दिली, आतां हे खेळगडे खेळच ना जाल्यार हातूंत तांचो दोश कितें?
ऋषभ पंताक आक्रमक खेळूं नाका म्हूण सांगलें जाल्यार ताका बचाव करून खेळपाकूच जमना. ध्रूव ज्युरेलान सरावाच्या मॅचींनी शेंकडे काडून आशा दाखयली आनी आयत्या वेळार घात मारलो, ऑस्ट्रेलिया आनी इंग्लंडांत नितीश कुमार रेड्डीन फास्ट बॉलींग ऑलरावंडर जावपाची आशा दाखयिल्ली. मात, ताणेंय आपली मर्यादा स्पश्ट केली. साई सुदर्शन प्रादेशीक पांवड्यार, आयपीएलांत खोरे घेवन धांवड्यो ओडटा आनी आंतरराष्ट्रीय मळार सरी घेवन बॅटींग करता, बॉल थेट विकेटीचेर पावता, तातूंत गंभीर – आगरकराचो दोश आसा? सर्फराज, इश्वरनाक कुशीक काडून ह्या खेळगड्यांचेर विस्वास दवरप होच तांचो दोश. भारतीय पंगड आतां टॅस्ट चँपियनशीप सर्तीचें फायनलींत पावचो ना, हें लागीं लागीं स्पश्ट आसा. मदीं बरें प्रदर्शन करून एकवेळ आशा दाखोवपाक शकता. मात, हेर पंगडांच्या कामगिरीचेरूय सगलें निंबून आसतलें. आतां पोरूं इंग्लंडान जें केल्लें, ते करपाची वेळ भारताचेर आयल्या. इंग्लंडान टॅस्ट चँपियनशीप तकलेंतल्यान काडून उडोवन फक्त माळ जिखपाचेर भर दिल्लो. ताचें फळ अंदूं तांकां मेळपाक शकता. भारताक तांणी 2-2 आडयलो. फुडेंय बरें प्रदर्शन करपाक शकता. तेन्ना भारतान पंगड कसो थीर जावपाक शकता, हाचेर लक्ष दिवपाक जाय. गिल, जैसवाल, बुमरा, सिराज, जडेजा, वॉशिंग्टन आनी कुलदीप ह्या 7 खेळगड्यांची, तशेंच ज्युरेल वा पंत हांचे मदल्या एकल्याची सुवात थीर दवरून हेर 3 सुवातां खातीर गंभीरपणान विचार करून योग्य खेळगडे ते-ते सुवातेर खेळोवपाक जाय. ते खातीर आवडटो-नावडटो प्रकार कुशीक काडपाचीय गरज आसा.
सर्फराज खान, इश्वरन हांचे वांगडाच श्रेयस अय्यर, यश ठाकूर, संजू सॅमसन, रुतुराज गायकवाड, पृथ्वी शॉ, तिलक वर्मा हांचो टॅस्ट क्रिकेटी खातीर विचार करून हर्षीत राणाक जशी एकार एक संद मेळटा तशी दिवची. फुडल्या एक-दोन वर्सांत भारत टॅस्ट क्रिकेटींत परतून एकदां शेक गाजोवपाक शकता.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
