भांगरभूंय | प्रतिनिधी
नवी दिल्ली, खबरां संस्था : भारतीय कफ सिरप पियेवन ६८ भुरग्यांक मरण आयिल्ल्याच्या प्रकरणांत सोमारा उझबेकिस्तानाच्या सर्वोच्च न्यायालयान २१ जाणांक २० वर्सां खर बंदखणीची ख्यास्त फर्मायल्या. हातूंत भारतीय वेपारी राघवेंद्र प्रताप हांचोय आसपाव आसा. ताचेर भ्रश्टाचार, फटींगपणाच्या प्रकरणांत दोशी थारल्यात.
उझबेकिस्तानांत २०२२ ते २०२३ मजगतीं सुमार ८६ भुरगीं कफ सिरप पियेल्ल्यान दुयेंत पडिल्लीं. तातूंतल्या ६८ भुरग्यांक मरण आयिल्लें.
मरण आयिल्ल्यांच्या नात्यांतल्या लोकांचे कागाळींचेर उझबेकिस्तान पुलिसांनी केस दाखल करून न्यायालयांत आरोपपत्र दाखल केल्लें. हातूंत उझबेकिस्तानांत डॉक- १ मॅक्स सिरप विकपी कंपनीचे संचालक राघवेंद्र प्रताप हाचेर आरोप आशिल्लो. आडनदर, फटींगपणां अशा गंभीर कलमा खाला ताचे आड गुन्यांव नोंद जाल्ले.
विखारी सिरपा विशीं डब्ल्यूएचची शिटकावणी
जानेवारी २०२३ वर्सा संवसारीक भलायकी संघटनेन भारतांतले मॅरियन बायोटेक कंपनीन तयार केल्ल्यो खोंकलेच्यो सिरपी भुरग्यांक दिवच्यो न्हय अशें सांगिल्लें. तांचीं नांवां म्ब्रोनॉल सिरप आनी DOK-1 Max अशीं आसात. हीं सायरपां नोयडाची आशिल्ली मॅरियन बायोटेक ही कंपनी तयार करता.
तपासणेंत दोनूय सिरपींचो दर्जो बरो नाशिल्ल्याचें डब्ल्यूएचओन सांगिल्लें. तातूंत डायथिलीन ग्लायकोल वा इथिलीन ग्लायकोल हे दोनूय घटक योग्य प्रमाणांत नाशिल्ले. चार सिरपां विशीं डब्ल्यूएचओन शिटकावणी दिल्ली. भारतांत हीं सिरपां विकपाक मेळनात. कंपनी फकत तांची निर्यात करता.
मेरियन बायोटेकचो उत्पादन परवानो रद्द
ही गजाल उजवाडाक आयले उपरांत भारत सरकारान मार्च २०२३ वर्सा खोंकलेची सिरप तयार करपी मॅरियन बायोटेक कंपनीचो उत्पादन परवानो रद्द केल्लो. मजगतीं, भारतांतल्यान आयात केल्ली आनीक एक कफ सिरप घेवन गांबियांतल्या ७० भुरग्यांक मरण आयिल्लें. सगळ्या भुरग्यांची किडनी फेल जाल्ली.
७० भुरग्यांच्या मरणाक गांबियान भारतांत केल्ल्या चार कफ सिरपींक दोशी थारायल्लें. तशेंच हे कफ सिरपी विशीं डब्ल्यूएचओन शिटकावणी दिल्ली. मात भारतान आमी खोंकलेचे सिरपीची तपासणी केल्ल्याचें सांगिल्लें. तांचो दर्जो बरो आशिल्ल्याचें दिसून आयलें. हाचे उपरांत गांबिया सरकारान निवेदन जारी करून आपल्या देशांतल्या भुरग्यांच्या मरणा कडेन भारतीय सिरपींचो कांयच संबंद ना अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
