भांगरभूंय | प्रतिनिधी
केंद्र सरकाराचो निर्णय
नवी दिल्ली, खबरां संस्था ः भारतीय अन्न म्हामंडळाचें अधिकृत शेअर कॅपिटल 10 हजार कोटी रुपयां वयल्यान 21 हजार कोटी रुपया मेरेन वाडोवपाचो निर्णय केंद्र सरकारान घेतला. देशाची शेतकी अर्थवेवस्था घटमूट करपा खातीर हो एक धोरणात्मक निर्णय अशें केंद्र सरकाराच्या गिरायक वेव्हार, अन्न आनी भौशीक पुरवण मंत्रालयान दावो केला.
भारतीय अन्न म्हामंडळ देशाची अन्न सुरक्षा सुनिश्चीत करपा खातीर वावुरता. केंद्र सरकारान जाहीर केल्ल्या हमी दरान (एमएसपी) अन्नधान्याची खरेदी करप, अन्नधान्यांच्या धोरणात्मक सांठ्याची देखरेख करप, गरजे प्रमाण केंद्र सरकाराच्या सुचोवण्यां प्रमाण राज्य सरकारांक आनी केंद्रीय प्रदेशांक अन्नधान्याचें वितरण करप, चड म्हारगायेच्या काळांत बाजारांत सांठयल्लीं अन्नधान्यां हाडून म्हारगाय आनी अन्नधान्यांचे दर नियंत्रीत दवरपाचे काम करता.
केंद्र सरकारान एफसीआयच्या शेअर भांडवलांत व्हड प्रमाणांत वाड केल्ल्यान एफसीआयचें काम चड गतीशील आनी व्यापक जातलें. एफसीआयची निधीची गरज आनी निधी उपलब्धतायचो उणाव भरुन येतलो. हाचे पयलीं निधींतलो हो उणाव पयस करपा खातीर एफसीआयक रोख रीण, उण्या मुजतीच्या रिणां सयत वेगवेगळ्या साधनांचो आदार घेवचो पडटालो.
भांडवल वाडपाचे सकारात्मक परिणाम…
भांडवल वाडपाक लागून एफसीआयक आपल्या साठवण सुविधांचें आधुनीकीकरण करपाक शकतले. येरादारीचें जाळें घटमूट करूं येता. आधुनिक तंत्रगिन्यानाचो उपेग करून शेतकी उत्पादनांचें कापणी उपरांतचें लुकसाण उणें करून अन्नधान्यांची उपलब्धताय वाडोवंक मेळटली. अन्नधान्यांचें वितरण चड कार्यक्षमतायेन करूं येता. तशेंच देशाची अन्न सुरक्षा घटमूट करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
