भांगरभूंय | प्रतिनिधी
नवी दिल्ली, खबरां संस्था: अर्थीक वर्स २०२४- २५ त युक्रेन- रशियांतल्या संघर्शा उपरांत कायम आशिल्ले म्हारगायेक व्हडलो ब्रेक लागपाक शकता. गिरायक मोल निर्देशांक (सीपीआय) आधारीत म्हारगायेचो दर ६ वर्सांनी सगळ्यांत उणो जावपाची अपेक्षा आसा. सेंटर फॉर मॉनिटरिंग इंडियन इकॉनॉमीन (सीएमआयई) येवपी अर्थीक वर्सा खातीर म्हारगाय दर ४.३०% उरपाचो अदमास उक्तायला. आदीं २०१८- १९त म्हारगाय दर ३.४% आशिल्लें. आरबीआयन फुडल्या वर्सा खातीर ४.५% म्हारगायेचें दर निश्चीत केलां. मात सीएमआय, म्हारगाय हाचे परस खूबच उणी आसतली अशें म्हणटा.
सीएमआयईच्या मतान, बटाट, कांदो आनी टोमॅटोचें दर वर्सभर तशेंच उरतलें. धान्या विशीं सांगचें म्हळ्यार आदींच्यानूच खूब म्हारग आशिल्ल्या धान्याची किंमत धडाधड देंवपाक शकता. बर्याच काळा सावन स्थिर आशिल्लें पॅट्रोल- डिझेलाचे दर पसून खूब देंवतले. विशेश म्हळ्यार डॉलराचें दरूय ८३ रुपयांच्या लागीं आसतले. २०२५- २६ त घरांच्या किंमतीय थोड्यो वाडटल्यो. अंदूं अमेरिकी फेडरल रिझर्व्ह व्याजदर कापपाक शकता. ताका लागून भारतांतूय व्याजदर उणो जावपाक शकता. परिणाम गृह आनी ऑटो रीण सवाय जातलें. सुमार ५२ म्हयन्यां सावन म्हारगायेचें दर ४% च्या वयर आसा. आरबीआयच्या म्हणण्या प्रमाण, तो ४% च्या सकयल आसचो. अंदूं जानेवारींत म्हारगाय दर ५.१% नोंद जाला. मजगतीं, खावपाच्या जिन्नसांची म्हारगाय ८.३% नोंद केल्या. ती डिसेंबरांत ९.५३% आशिल्ली.
म्हारगाय उणे रावपाचे संकेत
टोमॅटो, कांदो, बटाटांची पुरवण सुरळीत आसतली ताका लागून दर देंवतलें. भाजयांचेंय दर देंवतलें. पेट्रोल – डिझेलाच्यो किमती मर्यादीत.
फाटल्या वर्सा उत्तरेंतल्या आंतरराष्ट्रीय बाजारांत कच्च्या तेलाची किंमत देंविल्ल्यान दर देवपाची शक्यताय आसा. रुपयाचे तुळेंत डॉलर आनीक वाडपाची शक्यताय ना.
तांदूळ आनी धान्याचो दर देंवपाक लागतलो. गव्हाचें उत्पादन चड जातलें. ताका लागून पीठ चड म्हारग जावचें ना. तूर उत्पादन वाडिल्ल्यान सगळ्याची दाळीचें दर नियंत्रणांत आसतले. फुडल्या वर्सा देशांतल्या इंधनाचें दर चड वाडपाची शक्यताय ना. २३ ऑगस्ट सावन एलपीजीचे दर स्थिरपणान उणे जायत आसा. अंदूंय चड वाड जावपाची आस्त ना.
येवपी वेंचणुकेक लागून फुडल्या वर्सा २०२४-२५ च्या पयल्या तीन म्हयन्यांत चडशा वस्तूंची पुरवण सामान्य उरपाची शक्यताय आसा. वर्साच्या दुसर्या अर्दांत दरांत मात्शी वाड जावपाची शक्यताय आसा. पूण हें तात्पुरतें आसतलें. बरो पावस आनी पुरवण वाडल्यार दर देंवतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
