भांगरभूंय | प्रतिनिधी
नवी दिल्ली, खबरां संस्था ः म्हारगाय, बेरोजगारी, भलायकी आनी शिक्षणाचेर वाडपी खर्च ह्या सगळ्यांचो गरिबीचेर परिणाम जाता हाची चर्चा सदांच जाता. पूण हे वेळार नेमके कितेंचेर कितलो खर्च जाता हाची आंकडेवारी हाऊसहोल्ड कन्जम्पशन एक्स्पेंडिचर सर्वेक्षण (HCES) अहवालांतल्यान मुखार येता. ह्या सर्वेक्षणाचो अहवाल हालींच केंद्रीय सांख्यिकी खात्यान सादर केला, तातूंत गांवगिऱ्या वाठारांनी आनी शारांनी खर्चाच्या प्रमाणांत कसो बदल जाला हाचे विशीं आंकडेवारी सादर केल्या. तशेंच गांवगिऱ्या आनी शारां वाठारांतल्या खर्चाचीय तुळा केल्या.
HCES सर्वेक्षण म्हणल्यार नेमकें कितें?
ह्या सर्वेक्षणांत दर एका घरगुती वस्तूचेर सादारणपणान कितलो खर्च जाता? हाचेर आंकडेवारी एकठांय केल्या. हें नॅशनल सॅम्पल सर्व्हे ऑफिस (NSSO) करता. तशेंच भारताच्या प्रादेशिक स्थितीप्रमाण वेगवेगळ्या निकशांचेर आदारून म्हायती एकठांय करता. दर पांच वर्सांनी असो सर्वे आनी ताची आंकडेवारी केंद्र जाहीर करता. पूण 2017 वर्सा जाल्ल्या ह्या सर्वेक्षणाच्या अहवालांतली कांय म्हायती आयले उपरांत केंद्र सरकारान अहवाल रद्द केल्लो. ते उपरांत 2022-23 वर्साचो अहवाल केंद्र सरकारान जाहीर केलो.
अन्नधान्याचेर जावपी खर्च उणो (Reduction in expenditure on food)
फाटल्या 10 वर्सांत भारतीयांचो घरगुती अन्नधान्याचेर जावपी खर्च उणो जाला अशें सर्वेक्षणांतल्यान दिसून आयला. दुसरे वटेन अन्नधान्यापरस जनावरांच्या खाणा खातीर आनी दुदाचे पदार्थांचेर चड खर्च जाता अशें दिसून आयलां. चड कॅलरीज दिवपी खाणां पसून प्रथिनां आनी पोशक तत्वां दिवपी खाणांक भारतीय लोक चड पसंती दिता अशेंय ह्या आंकडेवारींतल्यान दिसून आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
