भांगरभूंय | प्रतिनिधी
नवी दिल्ली, खबरां संस्था: चिनान भारता सयत ९ देशांच्या सुमार २२ हजार किमी लांबायेच्या शिमेंचेर कारस्थानाचें नवें ‘ड्रॅगन’ मॉडेल तयार केलां. फाटल्या ८ वर्सांनी राष्ट्राध्यक्ष शी जिनपिंग हांणी सुरक्षा प्रकल्पांच्या नांवा खाला १७० परस चड नव्या चिनी गांवांची वसणूक केल्या.
चिनी सैन्य ह्या गांवांतल्या लोकांचो आपले खबरी म्हणून वापर करतात. हे गांवकरी सैन्यांक गुपीत म्हायती दितात. सैन्यांतल्यान निवृत्त जाल्ले चडशे लोक गांवांनी रावतात. न्युयॉर्क टायम्स आनी प्लॅनेट लॅबान ५ वर्सां चिनाच्या आंतरराष्ट्रीय शेमेवेल्या शेकड्यांनी उपग्रह फोटोंचो अभ्यास केलो. हातूंत चिनच्या उत्तरे कडल्या मंगोलिया पसून मध्य आशिया मेरेन, एलएसी (वास्तवीक नियंत्रण रेशा) ते दक्षिणे कडल्या व्हिएतनाम मेरेन चिनाच्या गांवांच्यो वसणुकी दिसून आयल्यो. ह्या गांवांनी रस्ते आनी इंटरनेटूय चालू केलां. चिनाच्या गांवांची आंकडो पांच वर्सांनी ५०० वर पावपाचो अदमास आसा.
भारताची व्हायब्रंट व्हिलेज येवजण
भारतान एलएसीचेर व्हायब्रंट व्हिलेज येवजण सुरू केल्या. चिनाचे तज्ज्ञ ब्रायन हार्ट हांच्या मतान, हे येवजणे खाला भारत नव्या गांवांची वसणूक करिना. जाल्यार पयलींच थळाव्या गांवांचें पुनरुज्जीवन करता.
गस्ती खातीर ग्रामस्थांक रु. २१ हजार मानधन
सरासरी १० हजार फूट उंचायेर आशिल्ल्यान ह्या गांवांतल्या लोकांक गस्ती खातीर चीन सरकार दर म्हयन्याक २१ हजार रुपया दिता. हांगा थळाव्या लोकां सयत दरेका कुटुंबाक सुमार २.५ लाख रुपया आनी याक (म्हस) दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
