भांगरभूंय | प्रतिनिधी
संवसारीक क्रिकेटीच्या इतिहासांत खूबशे याद उरपी खीण घडल्यात वा घडटना आमी पळयत आसात. कांय सर्ती अश्यो आसतात की त्यो फक्त जैता पुरत्यो मर्यादीत उरनात. त्यो एका नव्या युगाची सुरवात करतात. पयर म्हळ्यार आयतारा सोंपिल्ली संवसारीक क्रिकेट सर्त अशीच आमकां सगल्यां खातीर याद उरपीच थारली. हे सर्तींत भारतीय पंगडान फक्त वस्तादपण मेळयलें ना, जाल्यार संवसारीक क्रिकेट शक्तींक स्पश्ट संदेश दिलो तो असो की आयचे घडयेक क्रिकेटीत भारत हीच सगल्यांत व्हड शक्त आसा. महाशक्ती आसा. मर्यादीत ओव्हरींचे सर्तींतलो संवसारीक करंड तिसरे फावटी जिखतना सूर्यकुमार यादवाच्या पंगडान जो पराक्रम केलो तो पळयत जाल्यार अशें म्हणन दिसता की, इतिहासूच भारतीय क्रिकेटी मुखार दिमी मारून शरण आयलो. ह्या संवसारीक करंडाची सुरवात जातना भारतीय पंगडान एक आगळी वेगळी पंचलायन दिल्ली ‘हिस्टरी रिपीट करेंगे, ‘हिस्टरी डिफीट करेंगे’. ह्या पंचलायनींत भारतीय पंगडाचो आत्मविस्वास लिपिल्लो आशिल्लो. भूतकाळांतल्या येसाची पुनरावृत्ती करप आनी विरोधी पंगडाच्या इतिहासाक फाटीं घालप हो ह्या पंगडाचो निश्चेव आशिल्लो. सर्तीचे सुरवाते सावनूच भारतीय खेळगड्यांनी होच निश्चेव मैदानार प्रत्यक्ष कृतींत देंवयलो. हे सर्तींत भारतान दाखयिल्लो खेळ फक्त कुशळटायेचोच न्हय, जाल्यार तो शिस्त, आत्मविस्वास आनी संघभावनेचो एक बरो नमुनो आशिल्लो. बॅटींग आसूं, बॉलींग आसूं वा फिल्डींग आसूं, भारतीय पंगडान सगल्याच मळार विरोधी पंगडाक फाटीं उडयलो. भारताच्या बॅटसमनांनी सेगीत व्हड धांवड्यो काडल्यो, जाल्यार बॉलरांनी विरोधी पंगडाक चेपणा खाला दवरून निर्णयाक खिणाक विकेटी घेतल्यो. ताका लागून बळिश्ट पंगडांकूय भारता मुखार उबे रावप कठीण जालें आनी निमाणें इतिहास परतून बरयलो.
क्रिकेटींत परंपरीक महासत्ता मानतात त्या इंग्लंड आनी हेर पंगडां आड भारतान केल्ली कामगिरी विशेश अशी तोखणायेची थारली. ऑस्ट्रेलिये सारको पंगड जाल्यार सांखळी गटांतूच भायर पडचो हाचे वेल्यान आयची सर्त कितली कठीण जाल्या हें कळून येता. इंग्लंड, द. आफ्रिका, वेस्ट इंडीज बी पंगडांनीय खूबशा दसकां सावन आंतरराष्ट्रीय क्रिकेटीचेर कशें वर्चस्व गाजयलें हें नव्यान सांगपाची गरज ना. पूण हे सर्तींत भारतीय पंगडान जे निर्विवाद श्रेश्ठत्व गाजयलें आनी भारतीय क्रिकेटीक एका नव्या वैभवाच्या शिखराचेर व्हरून दवरलें तें पळयत जाल्यार आमचे खेळगडे निश्चीतपणान अभिनंदनाक पात्र आसात. विशेश म्हणल्यार भारताचो हो येसस्वी प्रवास अचकीत घडिल्लो ना. फाटल्या तीन-चार वर्सां सावन भारतीय क्रिकेट सेगीत उदरगतीचे तेंगशेर पावत आसा. वेगळ्या वेगळ्या पांवड्यार दादलो पंगड, बायलां पंगड तशेंच कनिश्ठ पांवड्या वेल्या सर्तींनी भारतान संवसारीक वस्तादपणां मेळयल्यांत. ताका लागून भारतीय क्रिकेटीची शक्त फक्त एका पंगडा पुरतीच मर्यादीत उरिल्ली ना. ती पुराय वेवस्थेची शक्त जाल्या. भारतीय क्रिकेटीच्या ह्या येसा फाटल्यान खूबशे घटक कार्यरत आसात. सगल्यांत पयलीं म्हणल्यार भारतीय क्रिकेट मंडळाची घटमूट संरचना. देशभरांत उबारिल्ली आधुनीक क्रिकेट अकादमी, उत्कृश्ट प्रशिक्षक आनी वैज्ञानीक पद्दतीन दितात तें प्रशिक्षण. हाका लागून नवे पिळगेतल्या खेळगड्यांक संदी मेळत आसात. गांवगिऱ्या वाठारा सावन महानगरां मेरेन क्रिकेटीचीं पाळांमुळां खोल मेरेन रुजल्यांत. ताका लागून प्रतिभावान खेळगडे सोदप आनी तांकां घडोवप सामकें सोंपें जालां. दुसरो म्हत्वाचो घटक म्हळ्यार आयपीएल सारकी सर्त.
भारतांत क्रिकेट हो फक्त खेळ नासून ती एक संस्कृती जाल्या. लाखांनी तरणाटे क्रिकेटीक करियर म्हूण स्विकारतात आनी देशा खातीर खेळपाचें सपन पळयतात. ताका लागून भारतीय क्रिकेटीची शक्त दिसानदीस वाडतूच आसा.
ह्या संवसारीक करंड सर्तीन एक गजाल स्पश्ट केल्या, आतां क्रिकेटीच्या नकाशाचेर भारत फक्त एक बळिश्ट पंगड न्हय, जाल्यार तो एक महाशक्ती आसा. ‘हिस्टरी रिपीट करेंगे, हिस्टरी डिफीट करेंगे’ हें सांगप तशें सोंपें नाशिल्लें. पूण प्रत्यक्षांत कृतींत हाडप अशक्यूच आशिल्लें. येजमान देशाच्या पंगडांतल्या खेळगड्यांचेर अपेक्षांचें जें वजें आसता त्या वज्या खाला चेपून वचप स्वभाविकूच आसता. ताका लागून आतां मेरेन येजमान देश केन्नाच सर्त जिखूंक शकलो ना हें वास्तव स्विकारप भाग आशिल्लें आनी भारता सारक्या खंडप्राय देशांत जंय क्रिकेट होच धर्म मानतात थंय तर येजमान पंगडा कडल्यान अपेक्षा करप म्हणल्यार कोणूय मुर्खांत काडपा सारकेंच आशिल्लें. पूण हांगाय आमी जिखले. येजमान देश लेगीत संवसारीक करंड जिखूंक शकता हेंच भारतीय खेळगड्यांनी दाखोवन दिलें. भारतीय खेळगड्यांनी संवसाराक दाखोवन दिलें की, क्रिकेटीच्या मैदानार आतां भारताचो भांगराचो काळ सुरू जाला. फुडारांत भारतीय क्रिकेटीची ही घोडधांव अशीच सुरू उरतली हीच अपेक्षा आसा. कारण आयज भारता कडेन प्रतिभावान खेळगडे, घटमूट मुळाव्यो सुविधा आनी जिखपाची जिद्द ह्यो सगल्यो गजाली आसात. ताका लागून क्रिकेटीच्या फुडारांतल्या इतिहासांत भारताचें नांव आनीक गतीन उजवाडाक येतलें हातूंत दुबाव ना.
आमी दोन वर्सां आदीं जिखिल्लो संवसारीक करंड तिगोवन दवरलो, आनी आमी तो तिसरे फावटी जिखलो आनी येजमान आसून लेगीत चेपणा खाला वचनासतना ताचेर नांव कोरांतलें. हें सहजतायेन साध्य जाल्लें ना जाल्यार ताचे फाटल्यान खूबशे कश्ट आशिल्ले. संघ भावनेंतल्यान साकारिल्लें हें येस आशिल्ल्यान विशिश्ट खेळगड्यांची नांवां घेवप योग्य थारचें ना, पूण जसप्रीत बुमरा, संजू सॅमसन हांचो ह्या सर्तींतलो खेळ कोणूच विसरचो ना. ह्या संवसारीक करंडाची सुरवात तशी उमेदीची नाशिल्ली. बांगलादेश सर्तींतल्यान फाटीं सरलो, आनी पाकिस्तानाक लागून मात्सो तणाव निर्माण जालो. पूण जशी सर्त मुखार वचत गेली तशें खेळानूच सगल्यांचेर वर्चस्व गाजयलें. सोशल मिडिया वेल्यान दिसून येता की ह्यो मॅची पाकिस्तानांतूय व्हड उमेदीन पळयल्यो. झुजा परस एकामेकां कडेन संवाद सादपाचे बरे मार्ग आसात हें संवसाराक सांगपाचो खेळ हो एक मार्ग. क्रिकेटींत आमी वैभवाच्या नव्या तेमकाचेर पावल्यात. भारतीय क्रिकेट मोगींक आतां आमचो पंगड थंयच कायमचो स्थिराविल्लो जाय. अपेक्षांचें वजें हें अशेंच आसता. एका काळार ब्राझील फुटबॉलांत दुसऱ्या नंबराचेर येवप हें लेगीत शोकांतिकाच मानताले. राष्ट्रीय अपेक्षा सदांच जिखपा खातीर आसतात. भारतांतूय क्रिकेटींत लोकांच्यो अपेक्षा अश्योच अवास्तव पांवड्यार पावल्यात. खेळांत जैत आनी हार ही आसताच आनी हें वास्तव स्विकारूनच मुखार वच्चें पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
