भांगरभूंय | प्रतिनिधी
भारतान येजमान इंग्लंडाक लॉर्ड्स मैदानाचेर जाल्ले तिसरे आनी निमाणे वन डे मॅचींत 16 धांवड्यांनी हारोवन बायलांचे वन डे माळेंत क्लीन स्वीप केलें. पयले खेपे इंग्लंडाक ताचेच भुंयेचेर क्लीन स्वीप करपाक भारता येस आयलें. मजगतीं, भारताची फास्ट बॉलर झुलन गोस्वामीची ही निमाणी आंतरराष्ट्रीय मॅच आशिल्ली. हे मॅची उपरांत ती आंतरराष्ट्रीय क्रिकेटींतल्यान निवृत्त जाली.
भारतान पयलीं बॅटींग करतना 45.4 ओव्हरींनी फक्त 169 धांवड्यो केल्यो. पूण, इंग्लंडाक 43.4 ओव्हरींनी 153 धांवड्यो करप शक्य जाल्यो. झुलन गोस्वामीन 10 ओव्हरींनी 30 धांवड्यो दितना 2 विकेटी घेतल्यो.
ते पयलीं भारताची सुरवात बरी जाली ना. पावर प्ले भितर भारताच्यो तीन विकेटी पडल्यो. ओपनर स्मृती मंधानान एक बाजू सांबाळून धरपाचो यत्न केलो. पूण, अखेरेक ती लेगीत 79 बॉलांनी 50 धांवड्यो करून बाद जाली. शेफाली शर्मा आनी यास्तिका भाटिया हांकां खातें लेगीत उगडपाक जमलें ना. मुखेली हरमनप्रीत कौरान 9 बॉलांनी फक्त 5 धांवड्यो केल्यो. उपरांत दिप्ती शर्मान अर्द शेंकड्याची खेळी करून भारताक पावणे दोनशेंच्या लागसार पावयलो. दिप्तीन 106 बॉलांनी नाबाद 68 धांवड्यो केल्यो.
मजगतीं, झुलनान 6 जानेवारी 2002क आंतरराष्ट्रीय क्रिकेटीक सुरवात केल्ली. अशे तरेन 19 वर्सांचे कारकिर्दींत तिणें 284 मॅचींनी 355 विकेटी घेतल्यात. तशेंच बायलांचे संवसारीक क्रिकेट सर्तींत सगल्यांत चड विकेटी घेवपाचो विक्रम तिच्या नांवाचेर आसा. तिणें संवसारीक सर्तींनी वट्ट 34 मॅची खेळटना 43 विकेटी घेतल्यात. तशेंच तिणें आंतरराष्ट्रीय क्रिकेटींत 1924 धांवड्यो केल्यात. हातूंत तीन अर्द शेंकड्यांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
