भांगरभूंय | प्रतिनिधी
नवी दिल्ली, खबरां संस्था ः संवसारांत 2024 वर्सा सगळ्यांत चड इंटरनॅट सेवा म्यानमारांत बंद केल्ली. ताचे उपरांत सगळ्यांत चड इंटरनॅट सेवा भारतांत बंद केल्ली. म्हळ्यार 2024 वर्सा म्यानमार पयलो, जाल्यार भारत दुसरे क्रमांक आशिल्लो. 2024 वर्सा मुखेलपणान जातीय हिंसाचार आनी निशेधांक लागून भारतांत 84 फावटीं आनी म्यानमारांत 85 फावटीं इंटरनॅट सेवा बंद केल्ली. ही म्हायती ॲक्सेस नाऊच्या अहवालांत उजवाडाक आयल्या.
2023 वर्सा 39 देशांनी वट्ट 283 फावटीं इंटरनॅट सेवा बंद केल्ली. तशेंच 2024 वर्सा 54 देशांनी वट्ट 296 फावटीं इंटरनॅट सेवा बंद केल्ली. भारतान 2024 वर्सा 84 फावटीं इंटरनॅट सेवा बंद केली. देखून 2018 वर्सा उपरांत पयलेच खेपे भारताचें नांव हे वळेरेंत दुसरें सुवातेर आसा.
मजगतीं, भारतान 2023 वर्सा 116 फावटीं इंटरनॅट सेवा बंद केल्ली. ताचे तुळेंत भारतान 2024 वर्सा 84 फावटीं इंटरनॅट सेवा बंद केली, जी 2024 वर्सा परस उणी जाल्या अशें अहवालांत म्हणलां. ह्या अहवाला प्रमाण 84तले 41 फावटीं इंटरनॅट बंद जावपाचें कारण आंदोलनां कडेन संबंदीत आशिल्लें, जाल्यार तातूंतले 23 फावटीं जातीय हिंसाचाराक लागून बांद जाल्ली. तशेंच फाटल्या वर्सा सरकारी नोकरे परिक्षे वेळार अधिकाऱ्यांनी पांच फावटीं इंटरनॅट बंद केल्लें.
2024 वर्सा 16 परस चड राज्यांनी आनी केंद्रशासित प्रदेशांनी एक फावट तरी इंटरनॅट बंद केल्लें. राज्या प्रमाण आंकडेवारी पळयल्यार मणिपूरांतल्या राज्य सरकारान देशांत सगळ्यांत चड फावटीं (21) इंटरनॅट सेवा बंद केल्ली. ताचे उपरांत हरियाणा (12) आनी जम्मू-काश्मीर (12) ही राज्यां आसात. मजगतीं, दूरसंचार कायदो 2023 आनी दूरसंचार निलंबन नेम 2024 च्या सुरक्षा उणावा कडेन लक्ष ओडून भारतांतल्या सगळ्या लोकां खातीर 2025 वर्स ‘इंटरनेट सेवा शटडाउन-मुक्त’ करपाचो उलो करता अशें अहवालांत म्हणलां.
फाटल्या वर्सा 54 देशांतल्या 296 परस चड सरकारांनी इंटरनॅट सेवा बंद केल्ली. आशिया पॅसिफीकांतल्या 11 देशांनी वा प्रदेशांनी अशा 202 व्यत्ययांची नोंद जाल्या. तशेंच 2024 वर्सा नोंद जाल्ल्या सगळ्या इंटरनॅट सेवा बंदींत म्यानमार, भारत आनी पाकिस्तान हांचो 64 टक्क्यां परस चड वांटो आसा अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
