भांगरभूंय | प्रतिनिधी
नवी दिल्ली, खबरां संस्था ः फाटल्या दशकांत भारत गरिबी उणी करपाक येसस्वी जाला. संवसारीक बँकेन आपल्या ‘गरिबी आनी इक्विटी ब्रीफ’ अहवालांत हें स्पश्ट केलां. अहवाला प्रमाण, भारतान 2011-12 ते 2022-23 ह्या काळांत 17.1 कोटी लोकांक अत्यंत गरिबींतल्यान भायर काडले.
गरिबी म्हळ्यार दिसाक 172 रुपया परस उण्या उत्पन्नाचेर जगपी लोकांचो आंकडो. 2011-12 वर्सा 16.2% आशिल्लो तो 2022-23 वर्सा 2.3% इतलो उणो जालो. हाका लागून 17.1 कोटी लोक गरिबी रेशे वयर पावल्यात.
अहवाला प्रमाण गांवांनी अत्यंत गरिबी 18.4 टक्क्यां वयल्यान 2.8 टक्क्यां मेरेन उणी जाल्या, जाल्यार शारांनी ती 10.7 टक्क्यां वयल्यान 1.1 टक्क्यां मेरेन उणी जाल्या. गांवगिऱ्या-शारांतलो फरक 7.7% वयल्यान 1.7% मेरेन उणो जालो. हो वर्सुकी 16% उणाव आसा.
भारत उण्या मध्यम उत्पन्नाच्या देशांत सामील
गरिबीचे आंकडे उणे जाले उपरांत आतां भारत उण्या मध्यम उत्पन्नाच्या देशांच्या श्रेणीत पावलां. दिसाक 292 रुपया परस उणे कमवपी लोक उण्या-मध्यम गरिबींत आसात अशें मानतात. ह्या आदाराचेर 2011-12 वर्सा 61.8% लोक गरिबींत रावताले, जाल्यार 2022-23 वर्सा तें 28.1% मेरेन उणें जालें. ह्या काळांत 37.8 कोटी लोकांक गरिबींतल्यान भायर सरपाक येस आयलें.
संवसारीक बँकेच्या अहवाला प्रमाण, 2021-22 वर्सा अत्यंत गरिबींत रावपी भारतांतली 65% लोकसंख्या उत्तर प्रदेश, महाराष्ट्र, बिहार, बंगाल आनी मध्य प्रदेश ह्या पांच चड लोकसंख्या आशिल्ल्या राज्यांनी आशिल्ली. त्याच वेळार 2022-23 मेरेन अत्यंत गरिबी उणी करपाक तांणी दोन तृतियांश योगदान दिलें. पूण अशें आसून लेगीत ह्या राज्यांनी आजूनय भारतांतली 54% लोकसंख्या अत्यंत गरिबींत रावतात आनी 51% लोक बहुआयामी गरीब आसात.
नीती आयोग 2024 वर्साच्या गरिबी विशीं अहवालांतले 3 मुद्दे…
० फाटल्या 9 वर्सांत भारतांत 24.8 कोटी लोक गरिबींतल्यान भायर सरले. तातुंतले सगळ्यांत चड 59.4 कोटी उत्तर प्रदेशांतले आसात.
० बिहारांत 3.77 कोटी, मध्य प्रदेशांत 2.30 कोटी आनी राजस्थानांत 1.87 कोटी लोकांच्या गरिबी पातळेंत सुदारणा जाल्या.
० भारतांत गरिबीचें प्रमाण 2013-14 वर्सा 29.17% आशिल्लें तें 2022-23 वर्सा 11.28% मेरेन देवलें. फाटल्या 9 वर्सांत 17.89% उणाव जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
