भारतान हातांतली मॅच वगडायली

भांगरभूंय | प्रतिनिधी

भारत आनी येजमान बांगलादेश ह्या देशाच्या बायलांच्या पंगडां मदली तिसरी वन डे टाय जाली. अशे तरेन तीन मॅचींची माळ 1-1 अशी बादाबाद उरली. माळेंतली पयली मॅच बांगलादेशान जाल्यार दुसरी मॅच भारतान जिखिल्ली.

मीरपूरांत जाल्ले मॅचींत बांगलादेशान टॉस जिखून पयलीं बॅटींग करपाचो निर्णय घेतलो आनी निर्धारीत 50 ओव्हरींनी 4 विकेटी वगडावन 225 धांवड्यो केल्यो. मोखीचो फाटलाव करतना भारताचो डाव 49.3 ओव्हरींनी 225 धांवड्यांचेर सोंपलो.

भारताक निमाण्या 19 बॉलांनी जैता खातीर 10 धांवड्यांची गरज आशिल्ली. पूण, ताका अपेस आयलें. तशेंच ताणें चार विकेटी लेगीत वगडायल्यो.

बांगलादेशा वतीन ओपनर फरगाना हकान शेंकडो मारलो. तिणें 160 बॉलांक तोंड दितना 107 धांवड्यांची खेळी केली. हातूंत सात चवक्यांचो आस्पाव आशिल्लो. तिची प्लेयर ऑफ द सिरिजा खातीर निवड केली. शमीमा सुल्ताना 78 बॉलांनी 52 धांवड्यो केल्यो. तिणें पांच चवके मारले. मुखेली निगार सुल्तानान 36 बॉलांनी 24 धांवड्यांचें योगदान दिलें. शोभनान नाबाद 23 धांवड्यांची खेळी केली. भारता वतीन स्नेह राणान दोन विकेटी घेतल्यो. तिचे खेरीत देविका वैद्यान एक विकेट मेळयली.

मोखीचो फाटलाव करपी भारता वतीन हरलीन देओल आनी स्मृती मंधाना हांणी अर्द शेंकड्याची भागिदारी केली. भारता वतीन हरलीन हिणें सगल्यांत चड धांवड्यो केल्यो. तिणें 108 बॉलांनी णव चवक्यांचे मजतीन 77 धांवड्यांची खेळी केली. तिची प्लेयर ऑफ मॅच खातीर निवड जाली.

स्मृतीन 59 धांवड्यांचें योगदान दिलें. जेमिमा रॉड्रिग्स 33 धांवड्यांचेर नाबाद उरली. मुखेली हरमनप्रीत कौर 14 धांवड्यो करून बाद जाली. अमनजोत कौरान 10 धांवड्यो केल्यो. दिप्ती शर्मान एक धांवडी केली, जाल्यार स्नेह राणा आनी देविका वैद्य हांकां खातें लेगीत उगडपाक जमलें ना.

स्मृती, कौर आनी जेमिमा हांणी भारताची आस्त जिवी दवरिल्ली. पावसाक लागून कांय वगत खेळ थांबवचो पडलो. पूण, पावसाचे आडखळी उपरांत परतून खेळ सुरू जालो आनी भारताक हरलीनाच्या रुपान मोठो धपको बसलो. फाटले मॅचींत प्लेयर ऑफ मॅचीचो पुरस्कार जिखपी जेमिमान कालचे मॅचींत बरी बॅटींग केली. पूण, तिका दुसरे वटेच्यान बरी साथ मेळ्ळी ना.

अखेरच्या दोन ओव्हरींनी भारताक जैता खातीर 9 धांवड्याची गरज आशिल्ली. जाल्यार बांगलादेशाक एक विकेटीची गरज आशिल्ली. जेमिमान एक बाजू सांबाळून धरिल्ली. पूण, बांगलादेशान मेघना सिंग हिका बाद करपा खातीर रणनिती तयार केली. मेघनान 49वी ओव्हर बरे तरेन खेळून काडली. निमाणे ओव्हरींत जैता खातीर तीन धांवड्यांची गरज आशिल्ली. पयल्या दोन बॉलांचेर एकेक धांवडी काडून मेघनान भारताक जैता वटेन व्हेलो. पूण, तिसरो बॉल बॅटाचे धारेक लागून विकेटकीपराच्या ग्लोव्सांत गेलो आनी बांगलादेशान मॅच टाय दवरली.