भांगरभूंय | प्रतिनिधी
भारतान दक्षीण आफ्रिका पंगडा आडची पांच मॅचींची टी-20 माळ 3-1 अशा फरकान जिखली. निमाणे मॅचींत ताणें 30 धांवड्यांनी जैत जोडलें.
भारतान दिल्ले 232 धांवड्यांचे मोखीचो करपी दक्षीण आफ्रिका पंगडान 20 ओव्हरींनी 8 विकेटी व्हगडावन 201 धांवड्यो केल्यो. स्पिनर वरुण चक्रवर्तीन सगल्यांत चड 4 विकेटी घेतल्यो. फास्ट बॉलर जसप्रीत बुमरान 2 विकेटी मेळयल्यो. दक्षीण आफ्रिके वतीन क्विंटन डी कॉकान 35 बॉलांनी 65 धांवड्यो केल्यो.
ते आदीं दक्षीण आफ्रिका पंगडान टॉस जिखून भारताक पयलीं बॅटींग करपाचें आमंत्रण दिलें. दक्षीण आफ्रिका पंगडान एक बदल केलो. लिंडे बदला नोर्टजेक निमाण्या इकरांत सुवात दिली. जाल्यार भारताच्या पंगडांत हर्षित राणाचे सुवातेर जसप्रीत बुमरा आयलो, जाल्यार कुलदीप यादवाचे सुवातेर वॉशिंग्टन सुंदराक संद दिली. गिल जखमी जाल्ल्यान ताचे सुवातेर संजू सॅमसन आयलो.
भारतान तिलक वर्मा आनी हार्दिक पांड्या हांच्या अर्द शेंकड्यां नेटार 5 विकेटी व्हगडावन 231 धांवड्यो केल्यो. तिलक वर्मान 32 बॉलांनी 73 धांवड्यो केल्यो. हातूंत णव चवक्यांचो आनी एका सक्याचो आस्पाव आशिल्लो. पांड्यान 25 बॉलांनी पांच चवके आनी पांच सक्यांचे मजतीन 63 धांवड्यांची आक्रमक बॅटींग केली. मुखेली सूर्यकुमार यादव (5) परतून अपेशी थारलो. जाल्यार संजू सॅमसनान (37) बरी सुरवात केली.पूण, ताका व्हड खेळी करपाक शक्य जालें ना. शिवम दुबेन तीन बॉलांनी 10 धांवड्यो केल्यो. जितेश एकूय बॉल खेळनासतना परतून गेलो. दक्षीण आफ्रिका वतीन कॉर्बिन बॉशान 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
