भांगरभूंय | प्रतिनिधी
भारताच्या बायलांच्या कम्पावण्ड पंगडान पयले खेपे संवसारीक तिरंदाजी वस्तादपण सर्त जिखली. सर्तीच्या इतिहासांत पयले खेपे भारताक भांगरा पदक फावो जालें. पयले खेपे सर्त 1931त खेळयिल्ली, जाल्यार कम्पावण्ड प्रकाराचो सर्तींत 1995त आस्पाव केल्लो. कम्पावण्ड प्रकाराचो ऑलिम्पिकांत आस्पाव करूंक ना.
जर्मनीची राजधानी बर्लिनांत चालू आशिल्ले संवसारीक तिरंदाजी वस्तादपण सर्तीच्या कम्पावण्ड प्रकारांत भारताच्या बायलांच्या पंगडान फायनलींत मॅक्सिको पंगडाक 235-229 फरकान हारयलो. भारताच्या पंगडांत ज्योती सुरेख, वेन्नम परनीत कौर आनी आदिती स्वामी हांचो आस्पाव आशिल्लो.
ते पयलीं सेमी फायनलींत भारतान कोलंबियाच्या पंगडाक 220-216 अशा फरकान हारयिल्लो. भारताक पयले फेरयेंत फुडली चाल मेळिल्ली. जाल्यार प्री क्वॉर्टर फायनलींत तुर्की पंगडाक आनी क्वॉर्टरफायनलींत चीनी तायपे पंगडाक हारयिल्लो.
बायलांच्या कम्पावण्डाच्या वैयक्तीक प्रकारांत भारताचे तीन तिरंदाज पयल्या आठांनी सुवात मेळोवपाक येसस्वी थारिल्ले. ज्योती सुरेख, वेन्नम परनीत कौर आनी आदिती स्वामी क्वॉर्टरफायनलींत सुवात मेळोवपाक येसस्वी थारिल्ली.
तिरंदाजींत संवसारीक करंड सर्त आनी संवसारीक वस्तादपण सर्तीचे दोन इव्हेंट जातात. संवसारीक तिरंदाजी वस्तादपण सर्तीची सुरवात 1931त जाल्ली. 1931 ते 1969 मेरेन ताचें दरेक वर्सा आयोजन जातालें. जाल्यार 1969 उपरांत हाचें आयोजन दरेकी दोन वर्सांनी जावपाक लागलें. भारतान हे सर्तींत णव खेपे रुप्या पदकां आनी दोन खेपे कांश्या पदकां जिखल्यात.
जाल्यार संवसारीक सर्तीचें आयोजन करपाची सुरवात 2006 सावन सुरू जाल्या. संवसारीक सर्त चार वर्सांनी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
