भांगरभूंय | प्रतिनिधी
आर आश्विन (नाबाद 42) आनी श्रेयस अय्यर (नाबाद 29) हांचे संयमी बॅटिंगेच्या नेटार भारतान येजमान बांगलादेशा आडची दुसरी आनी तिसरी टॅस्ट तीन विकेटींनी जिखली.
भारतान 145 धांवड्यांचो फाटलाव करतना चवथ्या दिसा 4 बाद 45 धांवड्यां वयल्यान मुखार खेळपा सुरवात केली. पूण, भारताचे तीन बॅट्समन रोखडेच बाद जाल्ल्यान ताची अवस्था 7 बाद 74 अशी वायट जाली. ते उपरांत अय्यर आनी आश्विन हांणी आठवे विकेटी खातीर 105 बॉलांनी निर्णायक नाबाद 71 धांवड्यांची भागिदारी करून भारताक जैत मेळोवन दिलें.
बांगलादेशाचो स्पिनर मेहदी हसन मिराजान 63 धांवड्यो दिवन 5 विकेटी घेतल्यो. पूण, तारा हेर बॉलरां कडल्यान म्हणपा सारकी साथ मेळूंक ना. ही माळ जिखून भारतान संवसारीक टॅस्ट वस्तादपण (डब्ल्यूटीसी) सर्तींतली आपली स्थिती घटमूट केली. भारतान पयली टॅस्ट 188 धांवड्यांनी जिखिल्ली.
चवथ्या दिसाचो खेळ सुरू जाल्या उपरांत स्पिनरांनी आपलो प्रभाव सोडपाक सुरवात केली. भारतान दुसरेच ओव्हरींत जयदेव उनाडकट (13) हाची विकेट वगडायली. पयल्या डावांत 93 धांवड्यांची खेळी करपी ऋषभ पंतान येना फुडें आक्रमक रूप आपणायलें. पूण, वैयक्तीक णव धांवड्यांचेर ताका मिराजान तंबूंत धाडलो. ते उपरांत मिराजान अक्षर पटेलाक (34) बाद करून भारताची अडचणींत वाड केली.
ते उपरांत मैदानांत आयिल्ल्या आश्विन आनी अय्यर हांणी पयलीं संयमान बॅटींग केली. पूण, स्कोरांत भर घालप ताणें चालूच दवरलें. ही भागिदारी फोडपाक बांगलादेशान फास्ट बॉलरांक बॉलिंगेक हाडले. पूण, ताच्या पदरांत निर्शेणीच आयली. आश्विनाक एक जीवनदान लेगीत मेळ्ळें. ताचो पुर्ण फायदो ताणें घेतलो.
आश्विनाची मॅन ऑफ द मॅच आनी चेतेश्वर पुजाराची मॅन ऑफ द सिरीज पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
