भारतान माळ जिखली

भांगरभूंय | प्रतिनिधी

येजमान भारतान बांगलादेशा आडची दुसरी टी-20 मॅच जिखून तीन मॅचींचे माळेंत 2-0 अशी निर्णायक आघाडी घेतली. भारतान पयलीं बॅटींग करतना निर्धारीत 20 ओव्हरींनी 9 विकेटी व्हगडावन 221 धांवड्यो केल्ल्यो. मोखीचो फाटलाव करतना बांगलादेशाक 20 ओव्हरींनी 9 विकेटी व्हगडावन 135 धांवड्यो करप शक्य जाल्यो.

बांगलादेशा वतीन निमाणी टी-20 माळ खेळपी महमुदुल्लाहन खर प्रतिकार केलो. पूण, ताका आपल्या पंगडाक जैत मेळोवन दिवपाक जमलें ना. परवेझ हुसैन इमोन आनी लिटन दास हांणी बांगलादेशाक बरी सुरवात करून दिल्ली. पूण, तिसरे ओव्हरींत अर्शदीप सिंगान परवेझाक 16 धांवड्यांचेर बोल्ड केलो. ते उपरांत तिसरे सुवातेर बॅटिंगेक आयिल्ल्या नजमूल हुसैन शांतो हो पांचवे ओव्हरींत वॉशिंग्टन सुंदराचे बॉलिंगेचेर 11 धांवड्यो करून बाद जालो.

फुडलेच ओव्हरींत वरुण चक्रवर्तीन लिटन दासाक बोल्ड केलो. तोहिद हृदोयाक फकत दोन धांवड्यो करप शक्य जाल्यो. अभिषेक शर्मान ताका बोल्ड केलो. अशे तरेन बांगलादेशान 46 धांवड्यांचेर 4 विकेटी व्हगडायल्यो. ते उपरांत महमुदुल्लाह आनी मेहदी हसन मिराज हांणी डाव सांबाळपाचो यत्न केलो. पूण, तांची भागिदारी रियान परागान फोडली. ताणें मिराजाक (16) तंबूंत धाडलो. ते उपरांत रिशाद हुसैन बाद जालो. ताका चक्रवर्तीन बाद केलो. ताची कॅच हार्दिक पांड्यान धरली. आंतरराष्ट्रीय टी-20त हार्दिकाची ही 50वी कॅच आशिल्ली. मजगतीं, महमुदुल्लाहाक तांझीम हसन साकिबान साथ दिली. अखेरेक तांझिमाक नितीश रेड्डीन बाद केलो. तरी आसतना महमुदुल्लाहान एक बाजू सांबाळून धरिल्ली. अखेरेक ताका नितीश रेड्डीन बाद केलो. महमुदुल्लाहान 39 बॉलांनी 41 धांवड्यो केल्यो.

ते पयलीं टॉस जिखून भारतान पयलीं बॅटींग केली. भारताची सुरवात बरी जावंक नाशिल्ली. एका वेळार तीन विकेटी व्हगडावन 41 धांवड्यो केल्ल्यो. ते उपरांत नितीश कुमार रेड्डी आनी रिंकू सिंग हांणी 108 धांवड्यांची भागिदारी करून भारताचो डाव सांबाळ्ळो. नितिशान 34 बॉलांनी 74 धांवड्यो केल्यो. हातूंत चार चवके आनी सात सके मारले. रिंकून 25 बॉलांनी पांच चवके आनी तीन सक्यांचे मजतीन 53 धांवड्यो केल्यो. दोगूय बाद जाल्या उपरांत पांड्यान 19 बॉलांनी 32 धांवड्यो केल्यो. पूण अखेरच्या ओव्हरींनी धांवगती वाडोवपाच्या यत्नांत भारतान विकेटी व्हगडायल्यो.