भारतान माळ जिखली

भांगरभूंय | प्रतिनिधी

भारतीय बायलांचे क्रिकेट पंगडान दुसरे टी-20 मॅचींत येजमान बांगलादेशाक 8 धांवड्यांनी हारयलो. ह्या जैता सयत भारतान तीन मॅचींचे माळेंत निर्णायक आघाडी घेतली. तिसरी आनी निमाणी मॅच 13 जुलयाक मीरपूरांत जातली.

भारतान काल टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 8 विकेटी वगडावन 95 धांवड्यो केल्यो. शेफाली वर्मान सगल्यांत चड 19 धांवड्यो केल्यो. ते उपरांत बॉलरांनी जबरदस्त प्रदर्शन करून बांगलादेशाक 20 ओव्हरींनी सगल्यो विकेटी घेवन 87 धांवड्यांचेर आडायलो.

भारता वतीन दिप्ती शर्मा आनी शेफाली वर्मा हांणी दरेकी 3 विकेटी घेतल्यो. मिन्नू मणीक दोन आनी बरेड्डी अनुषाक एक विकेट फावो जाली. दिप्ती शर्माची प्लेयर ऑफ दी मॅच पुरस्कारा खातीर निवड जाली.

ते पयलीं स्मृती मंधाना आनी शेफाली वर्मा हांणी भारताक बरी सुरवात करून दिली. पूण, उपरांत बांगलादेशाच्या बॉलरांनी फटाफट विकेटी घेतल्यो. स्मृती मंधानान 13 आनी शेफालीन 19 धांवड्यो केल्यो. दोगांयनी पयले विकेटी खातीर 33 धांवड्यांची भागिदारी केली. शेफालीची विकेट घेवपी सुल्ताना खातूनान पयल्याच बॉलाचेर हरमनप्रीत हिका बोल्ड केली. यास्तिका भाटिया (11), दिप्ती शर्मा (10) आनी अमनज्योत कौर (14) हांकां सोडलीं जाल्यार भारताच्या हेर बॅट्समनांक दोट्टी आंकडो लेगीत हुपपाक जमलो ना. बांगलादेशा वतीन खातूनान 3, फहिमा खातूनान 2 विकेटी घेतल्यो.

मणी आनी शर्मा हांणी 96 धांवड्यांचो फाटलाव करपी बांगलादेशाच्या ओपनरांक तंबूंत धाडले. बांगलादेशाचो अर्दो पंगड 64 धांवड्यांचेर तंबूंत परतून गेल्लो. मुखेली निगर सुल्ताना (38) हिका सोडली जाल्यार बांगालदेशाचे एकाय बॅट्समनाक दोट्टी आंकडो हुपपाक जमलो ना. 86 धांवड्यांचेर निगर बाद जाली. ते उपरांत फुडल्यो पांच विकेटी फकत दोन धांवड्यांचेर पडल्यो. 12 बॉलांनी 14 धांवड्यांची गरज आसतना दिप्ती शर्मान 19वे ओव्हरींत फकत चार धांवड्यो दिल्यो आनी निगर हिची म्हत्वाची विकेट घेतली. ते उपरांत 6 बॉलांनी 10 धांवड्यांची गरज आसतना शेफाली बॉलिंगेक आयली. तिणें फकत दोन धांवड्यो दीत चार विकेटी घेतल्यो. हातूंतली एक विकेट धांवबाद आशिल्ली. अखेरेक बांगलादेशाचो डाव 87चेर सोंपलो आनी भारताक आठ धांवड्यांनी जैत फावो जालें.