भारतान बांगलादेशाक दिली 56 एकर जमीन
भांगरभूंय | प्रतिनिधी
50 वर्सां उपरांत जमनीची देवाण-घेवाण
नवी दिल्ली, खबरां संस्था ः भारत आनी बांगलादेशांत 50 वर्सां उपरांत जमनीचें दिवप -घेवप जालां. बांगलादेशांतल्या लोकांनी ताका ईदी भेट म्हणलाल. भारतान शिमे वयल्या ठाकुरगांवच्या रानीशंकोई उपजिल्यांतली 56.86 एकर जमीन बांगलादेशाक दिल्या. हाका जाप दितना भारतानय बांगलादेशा कडल्यान 14.68 एकर जमीन घेतल्या.
भारतांतल्यान बीएसएफ (बॉर्डर सिक्युरिटी फोर्स) आनी बांगलादेशांतल्यान बीजीबी (बॉर्डर गार्ड बांगलादेश) हांचे मदीं जाल्ले ध्वज बसकेंत जमनींचें दिवप -घेवप जालें. भारत आनी बांगलादेश हांचेमदीं 1974 वर्सा जमनीचो देवाण- घेवाण करार जालो, पूण रानीशंकोईचेर कसलीच कारवाय जाली ना.
भारता कडल्यान बांगलादेशाक मेळिल्ली जमीन आतां खास खात्यान (सरकारी जमीन) अशें म्हणटले. हे जमनींतल्यान 48.12 एकर शेतवडी खाला, 6.87 एकर च्याच्या मळ्या खाला आनी 1.87 एकर लागवडी खाला आसा. दोनूय देशां मदीं जमनीची देवाण घेवाण सौहार्दपूर्ण रितीन जाला अशें बीजीबीचे कॅप्टन लेफ्टनंट कर्नल तंजीर अहमद हांणी सांगले. आमकां ईदी भेट मेळ्ळी. हाचे खातीर आमी बीएसएफाचे उपकार मानतात. आतां आमकां थंय वचून शेती करपाक मेळटलें.
बांगलादेशांतल्या हेर 8 जिल्ह्यांनी जमनीच्या वांटपा खातीर सर्वेक्षण करपाचो प्रस्ताव आसा. हाका लागून दोनूय देशांनी जमनीची वांटणी जातली. बीएसएफ, बीजीबी आनी हेर एजन्सीय ह्या सर्वेक्षणांत वांटो घेतले. वर्साचे अखेरेक हें सर्वेक्षण पुराय जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
