भांगरभूंय | प्रतिनिधी
खबरां संस्था
दुबयः आशिया कप सर्तीच्या आपल्या पयलेच मॅचींत भारतान आपलो पारंपरीक प्रतिस्पर्धी पाकिस्तानात 5 विकेटींनी हारयलें. निमाणे मेरेन उमळशीक वाडोवपी भारताच्या ह्या जैतान हेच स्टेडियमाचेर संवसारीक टी-20 सर्तींत पाकिस्ताना कडल्यान जाल्ल्या 10 विकेटींच्या हारीचो बदलो भारतान घेतलो. रवींद्र जडेजा आनी हार्दिक पंड्या ह्या अश्टतासी खेळगड्यांनी पांचवे विकेटी खातीर केल्ल्या 52 धांवड्याचे भागिदारीक लागून हारता काय जिखता अशें स्थितींत भारताक जैत मेळोवन दिलें. रवींद्र जडेजान 29 बॉलांत 35 आनी हार्दिकान नाबाद 17 बॉलांत नाबाद 33 धांवड्यो केल्यो. मोहम्मद नवाजाक सको मारून हार्दिकान भारताक 19.4 ओव्हरींत पंगडाक जैतिवंत केलें. पाकिस्तानाच्या 147 धांवड्यांक भारतान 5 बाद 148 अशी जाप दिली. भुवनेश्वर कुमार आनी हार्दिक पंड्या ह्या जैताचे शिल्पकार थारले.
टी-20 क्रिकेटींत पदार्पण करपी नसीम शहान ओपनर केएल राहुलाक पयले ओव्हरीच्या दुसऱ्या बॉलार किल्न बोल्ड करून भारताक व्हडलो धपको दिलो. राहुलाच्या बॅटाची भितली कड घेवन बॉल विकेटींक आपटलो आनी भारताची स्थिती 1 बाद 1 अशी जाली. कॅप्टन रोहीत शर्मान विराट कोहली वांगडा भारताचो अर्द शेंकडो पुराय केल्या उपरांत महम्मद नवाजान ताका कॅच आवट केलें. रोहितान 18 बॉलांत एक सक्यान फकत 12 धांवड्यो केल्यो. धांवड्यांत तीन धांवड्याची भर घातले उपरांत सुरवेक सावन अडखळत खेळपी विराटाक नवाजान इप्तिकारा वरवी कॅच आवट केलें. विराटान 34 बॉल खेळून तीन चौके आनी एका सक्यान 35 धांवड्यो केल्यो. आपली 100वी टी-20 मॅच खेळपी विराटाक अजून फॉर्म मेळना हें दिसून आयलें.
नवाजान सेगीत दोन विकेटी घेवन पाकिस्तानाच्या आव्हानाक धार हाडली. भारत सहज जिखतलो अशें दिसताले ते सुवातेर पाकिस्तान जिखतलो अशें ह्या वेळार दिसपाक लागलें. रवींद जडेजा आनी सूर्यकुमार यादव हांचेर भारताची आस्त आशिल्ली अश्या वेळार नसीम शहान सूर्यकुमार यादवाची विकेट काढून भारताची स्थिती 4 बाद 89 अशी करून तांच्या पंगडाच्या जैताची आस्त वाडयली. सूर्यकुमारान 18 बॉलांत एका चौक्यान 18 धांवड्यो केल्यो. भारतान 14.4 ओव्हींत 94 धांवड्यो केल्यो तेन्ना दोनूय पंगडांक जैताची सारकी संद आशिल्ली. भारताक जैत मेळोवपाची जापसालदारी आतां जडेजा आन हार्दिक पंड्याचेर येवन पडली. पाकिस्तानाचो विकेटकीपर मोहम्मद रिझवान आनी फास्ट बॉलर नसीमाक पायांत गुळे येवन त्रास जाले. ताच्या बॉलार जडेजाक अंपायरान एलबीडल्ब्यू दिलें मात रिव्ह्यू भारताच्या फावरदान गेलो आनी जैत हारीच्या हुंबऱ्याक भारताक व्हडली थाकाय मेळ्ळी. जडेजान हे उपरांत एक सको हुबयलो आनी भारताच्या जैताची आस्त वाडयली. निमाण्या 11 बॉलांत भारताक ह्या वेळार 20 धांवड्यांची गरज आशिल्ली. हार्दिकान 10व्या 9व्या आनी 8व्या बॉलांत चौके मारले आनी निमाणे सको हुबोवन मारून भारताच्या जैताचो बावटो हुबयलो.
पाकिस्तानाचो 147 धांवड्यांत खुर्दो
भारतीय पंगडान टॉस जिखले उपरांत फिल्डिंग घेवन दोळे दिपकावपी कामगिरी केली. ताका लागून तांणी अर्दी लडाय जिखल्ल्याचें पळोवपाक मेळ्ळें. भारतान पयल्या बॉला सावन पाकिस्तानाचेर अंकुश दवोरल्याचे दिसलें. ताका लागून पाकिस्तानी खेळगड्यांक धांवड्यो करप कुस्तार जालें. भुवनेश्वर कुमारान आपल्या अणभवाच्या खुस्तार भारताक चार मत्वाच्यो विकेटी मेळोवन दिल्यो. दुसरे वटेन हार्दिक पंड्यान पाकिस्तानाक तीन धपके दिले. ताका लागून पाकिस्तानाचो पंगड पुरायपणान भारताच्या चेंपणा खाला उरलो. भारतान थारावीक फरकान पाकिस्तानाक धपके दिले आनी ताका लागून तांकां चड धांवण्यो करपाक जमलें ना. पाकिस्तानाचो डाव 19.5 ओव्हरींत 147 धांवड्यांत सोपलो.
भुवनेश्वर कुमारान पाकिस्तानाक पयलो धफको दिलो. ते उपरांत हार्दिकान तांकां एकाफाटल्यान एक तीन धपके दिवन तांचे बॅटिंगेचें कमर मोडलें. भारताच्या बॉलरांनी पाकिस्तानाच्या बॅट्समनाक तकली वयर काडपाक दिली ना. निमाण्या ओव्हरींत भारताच्या बॉलरांनी बरी कामगिरी करून दाखयली. ताका लागून पाकिस्तानात देडेशें धांवड्यो लेगीत करपाक मेळ्ळें ना. शहनवाज धानी मारिल्ल्या दोन सक्यांक लागून तांकां 147 धांवड्या मेरेन पावप शक्य जालें.
भुवनेश्वर कुमाराच्या आनी डावाचे पयले ओव्हरीच्या दुसऱ्या बॉलार भारताक विकेट मेळ्ळी. मोहम्मद रिझवानाच्या एलबीडब्ल्यू केलें. अंपायरान ताका आवट दिलें मात तांणे रिव्ह्यू घेतलो आनी तो आवट ना हें दिसून आयलें. हे ओव्हरीच्या निमाण्या बॉलार रिझवान कॅच आवट आशिल्ले खातीर रिव्ह्यू घेतलो मात विकेट मेळ्ळी ना. भुवनेश्वर कुमारान तिसऱे ओव्हरीच्या चवथ्या बॉलार कॅप्टन बाबर आझमाक कॅच आवट केलें. अर्शदीपान थर्ड मेनाक बाबराची सोपी कॅच घेतली. बाबर फकत 10 धांवड्यो करून आवट जालो आनी भारताचे वाटेंतलो व्हडलो कांटो ना जालो.
सवे ओव्हरीचे दुसऱ्या बॉलार आवेश खानान पाकिस्तानाक दुसरो धपको दिलो. ताणे फखर जमानीच विकेट घेतली. ताणे घातिल्लो बॉल फखराच्या बॅटीक लागून विकेटकीपर दिनेश कार्तिका कडेन गेलो. 13वे ओव्हरीच्या पयल्याच बॉलार हार्दिक पंड्यान इफ्तिखार अहमदाक 28 धांवड्यांचेर बाद केलें. बावंसराचेर दिनेश कार्तिकान सुपर कॅच घेतली. 15 वे ओव्हरींत हार्दिकान मोहम्मद रिझवानाची विकेट घेतली. ताणे हवेंत मारिल्लो बॉल आवेश खानान धरलो. पाकिस्तानाचे पयले तीन बॅट्समन शॉर्ट पीच बॉलांचेर आवट जाले. हेच ओव्हरीच्या तिसऱ्या बॉलार हार्दिकान खुशदील शाहाक 2 धांवड्याचेर बाद केलें. शहनवाज धानीन 6 बॉलांत दोन सक्यांनी केल्ल्या 16 धांवड्यांक लागून पाकिस्तान 9 बाद 128 वयल्यान सगले बाद 147 धांवड्याचेर पावलो. रिझवानान 42 बॉलांत 4 चौके आनी एक सक्यान 43 धाव्ड्यो केल्यो जाल्यार इप्तिकारान 22 बॉलांत 2 चौके आनी एका सक्यान 28 धांवड्यो केल्यो. हे दोन बॅट्समन सोडल्यार पाकिस्तानाचे हेर बॅट्समन चड वेळ खेळपट्टेर तिगले नात. भुवनेश्वर कुमारान 26 धांवड्यांत 4 हार्दिक पंड्यान 25 धांवड्यांत 3 आनी अर्शदीप सिंगान 33 धांवड्यांत दोन विकेटी घेतल्यो. आवेश खानाक एक विकेट मेळ्ळी. पाकिस्ताच्या पख्तुन, सिंध प्रांतात आयिल्ल्या हुंवारांक लागून लोक मेल्ल्यान ताचें दुख्ख उक्तावपा खातीर पाकिस्तानी पंगड हाताक काळ्यो पट्टे लावन खेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
