भांगरभूंय | प्रतिनिधी
भारताचो क्रिकेट पंगड 12 वर्सांनी घरच्या मैदानाचेर टॅस्ट माळ हारलो. पुणे टॅस्टीच्या तिसऱ्या दिसा बरे सुरवाती उपरांत लेगीत भारताचे बॅट्समन मिचेल सॅण्टनराचे स्पिन बॉलिंगे मुखार गडगडले. भारताचो दुसरो डाव 245 धांवड्यांचेर सोंपलो आनी न्युझिलॅण्डाक 113 धांवड्यांनी जैत फावो जालें. न्युझिलॅण्डान पयले खेपे भारतांत टॅस्ट माळ जिखपाक येस मेळयलें. तशेंच ह्या जैतान ताणें तीन टॅस्टींचे माळेंत 2-0 अशी निर्णायक आघाडी घेतली.
रोहीत शर्मा आनी यशस्वी जयस्वाल हे ओपनरांचे जोडयेन आक्रमक बॅटींग करपाची रणनिती घेवन मैदानांत पावल दवरिल्लें. पयल्या डावांत जो चुकी केल्ल्यो तातूंतल्यान भारताच्या बॅट्समनांनी धडो घेतला अशें सुरवातीक दिशिल्लें. रोहीत आनी यशस्वी दोगांयनी पांयाचो बरे तरेन उपेग केलो आनी स्पिनरांक स्वीप शॉर्ट लेगीत खेळ्ळे. पूण, रोहीत रोखडोच बाद जालो. पयलें सत्र सोंपलें त्या वेळार भारतान 1 विकेट व्हगडावन 81 धांवड्यो केल्ल्यो.
जयस्वाल अर्द शेंकड्या लागसार आशिल्लो आनी शुभमन गिला वांगडा मेळून भारताची धांव गती स धांवड्यो प्रती ओव्हरी मेरेन व्हेली.
भारताक मॅचींत येवपाक एका बऱ्या सत्राची गरज आशिल्ली. पूण, दुसरें सत्र पुर्णपणान न्युझिलॅण्डा वटेन गेलें. हाचो सॅण्टनर सुत्रधार थारलो.
शुभमन बाद जाल्या उपरांत जयस्वाल लेगीत चड वगत खेळपट्टीचेर तग धरपाक शकलो ना. दोगूय डिफॅन्स करपाच्या यत्नांत स्लिपांत कॅच बाद जाले. हांगाच्यान मॅच मुखार व्हरपाची जापसालदारकी विराट कोहली आनी ऋषभ पंत हांचेर आशिल्ली. पूण, पंत गडबडींत धांवबाद जालो. ही विकेट भारताचे मानसीक चेपण हाडपाक पुरो थारली.
पंत बाद जाल्या उपरांत भारताची धांवगती हळू जाली आनी स्पिनरांक लेगीत हे खेळपट्टींतल्यान खूब मजत मेळपाक लागली. कोहली लेगीत चड वगत खेळपट्टीचेर उरूंक ना. तो एलबीडब्ल्यू बाद जालो. फाटले टॅस्टींत शेंकडो मारपी सरफराज खान हे खेपे लेगीत सॅण्टनराचो शिकार थारलो. बॉल डिफॅन्स करपाक गेलो आनी तो बोल्ड जालो. हांगाच्यान भारताचेर 12 वर्सांनी घरच्या मैदानाचेर टॅस्ट माळ व्हगडावपाचें सांवट पातळपाक लागलें. आर आश्विन आनी रवींद्र जडेजा हांणी कांय वगत न्युझिलॅण्डाचें जैत लांबयलें. दोगांयनी 75 बॉलांनी 38 धांवड्यांची भागिदारी केली. पूण, आश्विन बाद जायना फुडें भारताचो डाव चड लांबलो ना.
सॅण्टनरान मॅचींत वट्ट 13 विकेटी घेतल्यो. पयल्या डावांत ताणें सात विकेटी घेतिल्ल्यो, जाल्यार दुसऱ्या डावांत स विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
