भांगरभूंय | प्रतिनिधी
भारताच्या दादल्यांच्या हॉकी पंगडान एफआयएच प्रो लीग 2023-24च्या निमाण्या टप्प्यांतले पयले मॅचींत संवसारीक वस्ताद जर्मनी पंगडाक 3-0 असो हारयलो.
ली वॅली स्टेडियमाचेर जाल्ले मॅचींत भारता वतीन हरमनप्रीत सिंगान 16व्या मिनटाक, सुखजीत सिंगान 41व्या मिनटाक आनी गुरजंत सिंगान 44व्या मिनटाक गोल केलो. जाल्यार जर्मनीक एक लेगीत गोल करपाक जमलो ना. भारताचो पंगड एफआयएच प्रो लीग 2023-24त 13 मॅचींनी 24 गुणां सयत तिसरे सुवातेर आसा.
भारतान सुरवाती सावन मॅचीचेर आपलो शेक दवरलो. मॅच सुरू जावन कांय मिनटां जाता थंय आसा भारताक गोल करपाची संद फावो जाली. पूण, पंगडाक येस मेळूंक ना. जर्मनीक तीन पॅनल्टी कॉर्नर मेळ्ळे. पूण, ताका लेगीत ताचो फायदो घेवन गोल करपाक जमलो ना. पयल्या क्वॉर्टरांत एकूय गोल जालो ना.
दुसऱ्या क्वॉर्टरांत खातें उगडपाच्या सोदांत आशिल्ल्या भारतान 16व्या मिनटाक आपलो पयलो गोल केलो. हरमनप्रीतान पॅनल्टी कॉर्नराचेर हो गोल केलो. आघाडी घेना फुडें भारतान आपल्या खेळांत आनीक आक्रमकताय हाडून प्रतिस्पर्धी पंगडाचेर चेपण दवरलो. पूण, पयल्या अर्दांत ताका आनीक येस मेळूंक ना. मध्यांतरा मेरेन भारत 1-0 असो मुखार आशिल्लो.
दुसऱ्या अर्दांत जर्मनी पंगडाक आक्रमक रणनिती वरवीं सुरवात केली. ताणें गोल करपाचे साबार यत्न केले. पूण, भारताच्या जबरदस्त बचाव फळये मुखार जर्मनीचें कांयच शाणपण चलूंक ना.
तिसऱ्या क्वॉर्टरांत जर्मनीक आनीक एक पॅनल्टी कॉर्नर मेळ्ळो. पूण, हे खेपे लेगीत ताका गोल करपाक जमलो ना. 41व्या मिनटाक सुखजीत सिंगान फिल्ड गोल करून भारताची आघाडी 2-0 अशी केली. ह्या गोलाच्या दोन मिनटां उपरांत गुरजंत सिंगान गोल केलो. ह्या गोला उपरांत भारतान 3-0 अशी निर्णायक आघाडी घेतली.
चवथ्या क्वॉर्टरांत एकूय गोल जालो ना. भारतान हे मॅचींत आत्मविस्वासान खेळ केलो. जर्मनीन परतून गोल करपाचो यत्न केलो. पूण, गोलकीपर पी आर श्रीजेशान तांचो यत्न परतावन लायलो. ह्या क्वॉर्टरांत जर्मनीक तीन पॅनल्टी कॉर्नर मेळ्ळे. तरी आसतना तांचो गोल स्कोर बोर्ड कोरोच उरलो. भारतान 3-0 फरकान जैत जोडलें. भारत आपली फुडली मॅच आयज ग्रेट ब्रिटना आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
