भांगरभूंय | प्रतिनिधी
येजमान भारतान ऑलिम्पिकांत रुप्या पदक जिखपी चीन पंगडाक 1-0 हारोवन बायलांची आशियायी चॅम्पियन्स ट्रॉफी हॉकी सर्तीचो किताब राखलो. मॅचींतलो एकोडो आनी म्हत्वाचो गोल ‘गोल्डन गर्ल’ दिपिका हिणें केलो. तिचो हो सर्तींतलो 11वो गोल थारलो.
पोरूं रांचींत आनी 2016त सिंगापूरांत वस्तादपण जोडपी भारतान उत्कृश्ट रितीन समन्वय आनी संयम दाखयलो.
मॅचीच्या दुसऱ्या अर्दाच्या पयल्याच मिनटाक भारताक पॅनल्टी कॉर्नर मेळ्ळो. दिपिकान कसलीच चूक करिनासतना पॅनल्टी कॉर्नराचेर बॉल जाळांत घालो.
तिसऱ्या क्वॉर्टरांत आघाडी वाडोवपाची भारता कडेन बरी संद आशिल्ली. 42व्या मिनटाक पॅनल्टी स्ट्रोक मेळिल्लो. पूण, दिपिकाचो शॉर्ट चीनाची गोलकीपर उजवे वटेन डायव्ह मारून गोल पडपा पसून आडायलो.
चवथ्या क्वॉर्टरांत भारताक आनीक एक पॅनल्टी कॉर्नर मेळिल्लो. पूण, ताचो फायदो घेवपाक भारताक जमलो ना.
ते पयलीं चीन पंगडान मॅचीचे सुरवातीक बॉलाचेर नियंत्रण दवरून आपलो शेक दवरपाचो यत्न केलो. पयल्या अर्दांत भारत आठ खेपे चीनाच्या सर्कलांत घुसलो. जाल्यार चीन पंगडाक फकत पांच खेपेच भारताच्या गोलपोस्टाचेर हल्लो केलो.
भारताच्यो खेळगडयो परतून एकदा फिनिशींग टच दिवपाक झुजतना दिसल्यो. जपाना आडचे सेमी फायनलींत भारताक 16 पॅनल्टी कॉर्नर मेळिल्ले. पूण, ताचेर भारताक एकूय गोल करपाक जमूंक ना. भारताचें हें दुबळेंपण फायनल मॅचीच्या पयल्या 30 मिनटांनी परतून पळोवपाक मेळ्ळें. ताका चार पॅनल्टी कॉर्नर मेळिल्ले. पूण, चारूय पॅनल्टी कॉर्नर फुकट गेले.
तिसरे सुवाते खातीर जाल्ले मॅचींत जपान पंगडान मलेशियाक 4-1 फरकान हारयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
