भांगरभूंय | प्रतिनिधी
भारतान 11 वर्सांचो आयसीसी करंडाचो दुकळ सोंपयत भारतान संवसारीक टी-20 क्रिकेट सर्तीचें वस्तादपण जोडलें. भारतान 2013त निमाणे खेपे आयसीसीचो करंड जिखिल्लो. तशेंच 2007 उपरांत दुसरे खेपे भारतान संवसारीक टी-20 क्रिकेट सर्तीच्या करंडाचेर नांव कोतरायलें.
उमळशीक वाडोवपी मॅचींत भारतान दक्षीण आफ्रिका पंगडाक 7 धांवड्यांनी हारयलो. भारतान दिल्ले 177 धांवड्यांचे मोखीचो फाटलाव करपी आफ्रिकेक 20 ओव्हरींनी 8 विकेटी व्हगडावन 169 धांवड्यो करप शक्य जालें. अखेरचे ओव्हरी मेरेन मॅच कोण जिखतलो हें सांगप कठीण जाल्लें.
भारतान सांघीक प्रदर्शनाच्या नेटार जैत जोडलें. पयलीं विराट कोहली, अक्षऱ पटेल आनी शिवम दुबे हांच्या नेटार आव्हानात्मक धांवसंख्या उबी केली, ते उपरांत बॉलरांनी खास करून फास्ट बॉलर जसप्रीत बुमराची बॉलींग आनी सुर्यकुमार यादवान अखेरचे ओव्हरींत धरिल्ली जबरदस्त कॅचीन मॅच घुंवली.
एका वेळार दक्षीण आफ्रिका ही मॅच सहज जिखतलो अशें दिशिल्लें. मदले फळयेंतलो बॅट्समन हॅन्रीक क्लासेनान (52) आक्रमक बॅटींग करून मॅच आफ्रिके वटेन घुंवडायिल्ली. पूण, पांड्यान ताका बाद करून भारताक म्हत्वाचें येस मेळोवन दिलें. ते उपरांत ल्हवल्हव करून मॅच आफ्रिकेच्या हातांतल्यान गेली.
ते पयलीं विराट कोहलीन राखून दवरिल्ली म्हत्वाची खेळी संवसारीक टी-20 क्रिकेट सर्तीचे फायनलींत केली. बॅटिंगेक अनुकूल आशिल्ले खेळपट्टीचेर भारताच्या सुरवातीच्या बॅट्समनांनी चुकीचे शॉर्ट खेळून आपल्यो विकेटी व्हगडायल्यो. पूण, विराट कोहली आनी अक्षर पटेल हांणी फिशालकायेन बॅटींग केली आनी दोगांयनी चवथे विकेटी खातीर 72 धांवड्यांची भागिदारी करून मॅचीचें चित्र बदल्लें. अक्षर पटेल धांवबाद जाल्या उपरांत कोहलीन गियर बदल्लें आनी पंगडाक आव्हानत्मक धांवसंख्या उबारून दिली.
रोहीत शर्मा (9), ऋषभ पंत (0) आनी सुर्यकुमार यादव (3) हे 34 धांवड्यां भितर तंबूंत परतले. भारतान पयले ओव्हरींत 15 धांवड्यो केल्यो, त्या वेळार स्कोर 200 वयर वतलो अशें दिशिल्लें. पूण, दुसरे ओव्हरींत केशव महाराजान भारताक दोन धपके दिले. कगिसो रबाडान सुर्याक बाद करून तिसरो धपको दिलो. ते उपरांत कोहली आनी अक्षर हांणी डाव मुखार व्हेलो. कोहलीन 4,4,2,4 धांवड्यो करून आपलो इरादो स्पश्ट केलो. अक्षरान मेळिल्ले बडतीचो फायदो घेत चार सके मारले. दोगांयनी 54 बॉलांनी 72 धांवड्यांची भागिदारी दुर्देवी रितीन फुटली. क्विंटन डी कॉकाच्या थ्रोचेर अक्षर धांवबाद जालो. ताणें 31 बॉलांनी एक चवको आनी चार सक्यांचे मजतीन 47 धांवड्यो केल्यो.
शिवम दुबे आक्रमक बॅटींग करपाचो हेतू घेवन मैदानांत देंविल्लो. पूण, कोहली सेट जावन लेगीत सादूरतायेचे भुमिकेंत दिसलो. ताणें अर्द शेंकडो पुर्ण करपा खातीर 48 बॉल घेतले. ते उपरांत ताणें गियर बदल्लें. कोहली आनी शिवम हांणी 31 बॉलांनी अर्द शेंकड्याची भागिदारी करून आफ्रिकेचेर चेपण हाडलें. पुर्ण सर्तींत धांवड्यो करपाक संघर्श करपी कोहली 59 बॉलांनी स चवके आनी दोन सक्यांचे मजतीन 76 धांवड्यो केल्यो. धांवड्यांची गती वाडोवपाच्या यत्नांत अखेरेक तो कॅच बाद जालो. हार्दीक पांड्यान पयल्याच बॉलाचेर थर्ड मॅन वाठारांत चवको मारलो. शिवम (27) 20वे ओव्हरींत कॅच बाद जालो.
आफ्रिके वतीन स्पिनर केशव महाराज आनी फास्ट बॉलर हॅन्रीक नोर्थ्या हाणें दरेकी दोन विकेटी घेतल्यो. कगिसो रबाडा आनी मार्को यानसन हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
