भांगरभूंय | प्रतिनिधी
भारतीय पॅरा अॅथलिट्सांनी चीनांतल्या हांगझू हांगा चालू आशिल्ले आशियायी पॅरा खेळां सर्तींत इतिहास घडयलो. भारतान आपली मोहीम 111 पदकां सयत येसस्वी रितीन सोंपयली. भारतान एखाद्र्या व्हड सर्तींत केल्ली ही आतां मेरेनची सर्वोत्कृश्ट कामगिरी थारली. भारतान 29 भांगरा पदकां, 31 रुप्या पदकां आनी 51 कांश्या पदकां जिखलीं.
हांगझूंत 23 सप्टेंबर ते 8 ऑक्टोबर मजगतीं जाल्ले आशियायी खेळां सर्तींत भारतान 107 पदकां जिखिल्लीं. पूण, आशियायी पॅरा खेळां सर्तींत भारतान हो वाट चिरो लेगीत फाटीं घालो. भारत पदक तकट्यांत पांचवी सुवात मेळयली.
हांगझूंतल्या आशियायी पॅरा खेळांत चीनान सगल्यांत चड 521 पदकां जिखली. ताणें 214 भांगरा पदकां, 167 रुप्या पदकां आनी 140 कांश्या पदकां जिखलीं. पदक तकट्यांत इराणान 131 पदकां जिखून दुसरी सुवात मेळयली. हातूंत 44 भांगर, 46 रुप्या पदकां आनी 41 कांश्या पदकांचो आस्पाव आसा. जाल्यार जपानान तिसरी सुवात मेळयली. ताणें 42 भांगर, 49 रुप्या पदकां आनी 59 कांश्या पदकां जिखलीं. कोरियान चवथी सुवात मेळयतना 30 भांगरा पदकां, 33 रुप्या पदकां आनी 40 कांश्या पदकां जिखलीं.
पयले ग्वांग्झू आशियायी पॅरा खेळां सर्तींत भारतान 14 पदकां जिखिल्ली. त्या वेळार भारत 15वे सुवातेर आशिल्लो. ते उपरांत 2014त भारत 15वे सुवातेर जाल्यार 2018त णववे सुवातेर आशिल्लो.
भारतान 2010त पयले खेपे राष्ट्रकूल खेळां सर्तींत 100 परस चड पदकां जिखिल्ली. त्या वेळार भारताच्या खात्यांत 101 पदकां आयिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
