भारतान आव्हान राखलें

भांगरभूंय | प्रतिनिधी

भारतान येजमान वॅस्ट इंडीज पंगडाक पांच टी-20 मॅचींचे माळेंतले तिसरे मॅचींत 7 विकेटींनी हारयलो. सुर्यकुमार यादवाचे आक्रमक खेळीक तिलक वर्माची संयमी साथ दीत भारताचें जैत निश्चीत केलें. ह्या जैतान भारतान आपलें आव्हान राखलें. सध्या तो 1-2 असो फाटीं आसा.

टॉस जिखून पयलीं बॅटींग करपाचो निर्णय घेवपी वॅस्ट इंडीजान निर्धारीत 20 ओव्हरींनी 5 विकेटी वगडावन 159 धांवड्यो केल्यो. भारतान 17.5 ओव्हरींनी 3 विकेटी वगडावन 164 धांवड्यो करून जैत जोडलें.

सुर्यान 2 बाद 34 वयल्यान डाव सांबाळ्ळो आनी तिलक वर्मा वांगडा 51 बॉालांनी 87 धांवड्यांची भागिदारी केली.

यशस्वी जयस्वाल (1) आनी शुभमन गिल (4) अपेशी थारले. पूण, सुर्या आनी तिलक हांणी चवके सके मारून आपलो इरादो स्पश्ट केलो. तिलक वर्मान संयमी बॅटींग केली. सुर्यान 23 बॉलांनी 14वो अर्द शेंकडो पुर्ण केलो. तो शेंकडो पुर्ण करतलो अशें दिशिल्लें. पूण, अल्झारी जोसेफान ताका बाद केलो. सुर्यान 44 बॉलांनी 10 चवके आनी चार सक्यांचे मजतीन 83 धांवड्यो केल्यो. भारता वतीन टी-20त सगल्यांत चड धांवड्यो करपाचे वळेरेंत सुर्यान चवथी सुवात मेळयली. ताणें शिखर धवनाक फाटीं घालो.

सुर्यान सेट केल्ली मॅच तिलक आनी हार्दीक पांड्या हांणी मुखार व्हेली. तिलकान 39 बॉलांनी नाबाद 49 धांवड्यो केल्यो. हार्दीकान नाबाद 20 धांवड्यो केल्यो.

ते पयलीं कुलदीप यादवान (3-24) वॅस्ट इंडीजाच्या तीन बॅट्समनांक बाद करून आंतरराष्ट्रीय टी-20 क्रिकेटींत सगल्यांत 50+ विकेटी घेवपी दुसरो बॉलर थारलो. कुलदीपान एकेच ओव्हरींत विंडीजाच्या निकोलस पुरन (20) आनी ब्रॅण्डन किंग (42) हांकां तंबूंत धाडले. पण, रोव्हमन पॉवेलान 19 बॉलांनी एक चवको आनी तीन सक्यांचे मजतीन नाबाद 40 धांवड्यो केल्यो आनी आपल्या पंगडाक 5 बाद 159 मेरेन पावयलो.