भांगरभूंय | प्रतिनिधी
खबरां संस्था
लखनोः निर्णायक म्हत्वाचे दुसर टी-20 मॅचींत न्यूझिलंडाक 6 विकेटींनी हारोवन भारतना तीन मॅचीचे हे माळेंत आपलें आव्हान जितें दवोरले. न्यूझिलंडाक तांच्या डावांत फकत 99 धांवड्यांत बाद केल्या उपरांत जैता खातीर जाय आशिल्ल्यो धांवड्यो करतना भारतान 19.5 ओव्हरी खेळच्यो पडल्यो. तांणी 4 बाद 104 धांवड्यो करून ही मॅच जिखली. 4 आवट 70 उपरांत सूर्यकुमार यादव (नाबाद 26) आनी कॅप्टन हार्दिक पंड्यान (नाबाद 15) हांणी हे जैत ओडून हाडलें. शुभमन गील (11), इशान किशन (19), राहुल त्रिपाठी (13) आनी वॉ़शिंग्टन सुंदर (10) हांणी जैताक हातभार लायलो.
लखनोच्या अटल बिहारी वाजपेयी स्टेडियाचेर टॉस जिखून पयलीं बॅटिंग घेवपाचो कॅप्टन मिचेल सेंटनराचो निर्णय न्यूझिलंडाक बरोच म्हारग पडलो. ही मॅच जिखून तीन मॅचींची ही टी-20 माळ जिखपाच्या तांच्या सपनाचेर हार्दिक पंड्याच्या भारतीय पंगडान उदक ओतून तांका 20 ओव्हरींत 8 बाद 99 धांवड्यांचेर आडायलें. माळेंतलें आव्हान जितें दवोरपा खातीर भारताक ही मॅच जिखप सामकें गरजेचें आशिल्लें. ताका लागून भारताच्या बॉलरांनी जीव तोडून बॉलींग केली आनी न्यूझिलंडाक भारता आड पयलेच फावट सामक्या उण्या धांवड्यांत पॅव्हलियनांत धाडलें. 1 आवट 21 अशी सुरू जाल्ली न्यूझिलंडाची घसरगुंडी कोणूंच थांबोवपाक शकलो ना.
मिचेल सेंटनरान नाबाद 19 धांवड्यो करून पंगडाची लज राखली. मायकल ब्रेसलेव आनी मार्क चॅम्पमनान देरकी 14 धांवड्यो करून तशेंच ओपनर फिन एलेन आनी ड्वेन कॉनवेन देरकी 11 धांवड्यो केल्ल्यान न्यूझिलंडाक कश्यो तरी 99 धांवड्यो करप शक्य जालें. ताचें बाकीचे बॅट्समन दोन अंकी धांवड्यो करपाक शकले नात. भारता खातीर अर्शदीप सिंहान दोन विकेटी घेतल्यो. कॅप्टन हार्दिक पंड्या, दीपक हुडा, युजवेंद्र चहल आनी वॉशिग्टन सुंदरान दरेकी एक विकेट घेवन न्यूझिलंडाच्या नांवार भारता आड सगल्यांक कमी धांवड्यांत बाद जावपाचो तांका नाकाशिल्लो विक्रम करपाक लायलें.
ओपनर फिन एलेनाची विकेट घेवन युजवेंद्र चहलान भारता वतीन टी-20 क्रिकेटींत सगल्यांत चड विकेटी घेवपाचो बॉलर जावपाचो मान मेळयलो. सध्या टी-20 इंटरनॅशनलांत ताच्या नांवार 91 विकेटी जाल्यात. ताणे भुवनेश्वर कुमाराक (90 विकेटी) फाटीं उडयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
