भांगरभूंय | प्रतिनिधी
इस्रायल आनी हमास हांच्या झुजांतलो नवो अंक आतां सुरू जाला. दोन दिसां पयलीं ह्या झुजांत नव्या तंत्रज्ञानाचो वापर
केल्लो, आनी पुराय संवसारांत तंत्रज्ञानाचो उपेग आनी दुरुपेग हाचेर परतून चर्चा जावंक लागली. दोन दिसां पयलीं लेबनॉनांत एकाच वेळार हजारांनी पेजराचो स्फोट जालो. हो स्फोट ताजो आसतनाच ताच्या दुसऱ्या दिसा लेबनॉनांत हजारांनी वॉकिटॉकिचो स्फोट जालो. ह्या स्फोटांत हजारांनी हिजबुल्ला जखमी जाले जाल्यार कांय जाणांक जीव व्हगडावचो पडलो. संवसारभर ह्या स्फोटाची चर्चा सुरू जाली. हो स्फोट इस्रायलाची गुप्तचर संघटणा मोसादान घडोवन हाडला असो आरोप लेबनॉनान केला आनी ह्या स्फोटाक रोखडीच परती जाप दितले अशी घोशणा केली.
ह्या स्फोटा उपरांत पुराय संवसारांत खवदळ पडलो. पेजर सारक्या ल्हान उपकरणाचो संहारक शस्त्र म्हूण वापर करूं येता असो विचारूच कोणे केलो ना. वास्तवीक पेजर हें सद्या काळाभायरें जाल्लें उपकरण. 1990 वर्सा आयिल्लें हें उपकरण एकामेकां कडेन मॅसेजी वरवीं संपर्क करपा खातीर वापरताले. हातूंत फोना भशेन उलोवंक येना. जाल्यार ह्या उपकरणा वरवीं फक्त एकामेकांक ल्हान अशें टेक्स मॅसेज धाडूंक मेळटाले. भारतांत हें उपकरण 1995 वर्सा आयलें. पूण हें उपकरण तितलें येसस्वी थारलें ना. मोबायल आयले उपरांत तर ताचो वापरूच सोंपलो. अशें आसून लेगीत काळाभायरें जाल्लें हें उपकरण हिजबुल्ला कित्याक वापरताले असो प्रस्न पडला आसत जाल्यार ताची जाप अशी, पेजर वापरकर्त्याचे लोकशेन ट्रेस करूंक मेळना. फक्त मॅसेज धाडत आशिल्ल्यान मॅसेज दोगां बगर तिसऱ्याक दिसना. म्हणूनच हिजबुल्लाचे कमांडर हे उपकरण वापरताले.
हें उपकरण सुरक्षीत आसा असो तांचो समज आशिल्लो. पूण हो समज तेन्ना फट थारलो. जेन्ना लेबनॉनांत एका फाटोफाट एक स्फोट जाले. लेबनॉनांत ज्या पेजराचो स्फोट जालो त्या पेजरांत थोड्या प्रमाणांत पेईटीएन स्फोटकांचो वापर केल्लो. ह्या पेजरांत ज्या बॅटरींचो वापर केल्लो त्यो आयात केल्ल्यो. ह्याच बॅटरीं मदीं हीं स्फोटकां लिपयिल्लीं अशें म्हणटात. ह्या स्फोटा उपरांत संवसारभर इलेक्ट्रॉनीक उपकरणांचे सुरक्षेचो प्रस्न उपस्थीत करतात. भारतांतूय आतां तसोच प्रस्न विचारतात. कारण फुडारांत झूज हें अशाच तंत्रज्ञानाचो वापर करून लढटले. आयज जें तंत्रज्ञान वापरून इस्रायलान हो हल्लो केलो तेंच तंत्रज्ञान जर आतंकवाद्यांच्या हाताक लागलें जाल्यार संवसारभर खवदळ पडटलो. भारतांत तर अब्जावधी लोक मोबायल वापरतात. संवसारांत चडांत चड मोबायल भारतीय नागरीक वापरतात. आयज जर पेजर, वॉकिटॉकीचो वापर बॉम्ब म्हूण करतात जाल्यार फुडारांत मोबायल लेगीत बॉम्ब जावंक शकता. भारतांत जे मोबायल वापरतात ताची बॅटरी ही विदेशांतल्यान आयात केल्ली आसता. भारतांत वापरतात त्या 90 टक्के मोबायलाच्यो बॅटरी ह्यो चीन, तैवान आनी हाँगकाँग हांगा सावन आमी आयात करतात. फक्त मोबायल वा मोबायलाची बॅटरीच न्हय जाल्यार दीसपट्टे पांच लक्ष इलेक्ट्रॉनीक वस्तू आमी विदेशांतल्यान आयात करतात. भारतांतली संबंदीत अथॉरिटी लेगीत मान्य करतली की देशांत आयात जावपी 90 टक्के उपकरणांची कसलीच तपासणी जायना. हाचें वेल्यान लक्षांत येतलें की आमच्या देशांत कितली घातक परिस्थिती आसा ती.
देशांतलो दरेक नागरीक आपल्या बोल्सांत एक बॉम्ब घेवन भोंवता अशें म्हणल्यार चुकीचें थारचें ना. फाटल्या कांय दिसांत जम्मू कश्मीरांत आतंकवादी परतून सक्रीय जाल्यात. कश्मीरांत घुसखोरी वाडल्या. शिमेर आतंकवाद्यांच्यो कारवायो वाडल्यात. गुप्तचर संस्थांचे चवकशेंतल्यान हें निश्पन्न जालां की आतंकवादी घुसखोरी करतना व्हड प्रमाणांत मोबायल ‘प’ चो वापर करतात. ह्या ‘प’ चो वापर गिर्यारोहक पर्वतार, दोंगरार चडपा खातीर करतात. आतां ह्याच ‘प’ चो वापर करीत आतंकवादी घुसखोरी करीत आसतात. चीन जाल्यार आपलो पयल्या नंबराचो दुस्मान आसा. तंत्रज्ञानाचो दुरुपेग करपाक चीनाचो हात कोणूच धरूंक शकचो ना. फाल्यां लेबनॉन स्फोटांत वापरिल्लें तंत्रज्ञान आतंकवाद्यांच्या हाताक लागलें वा चीन सारको देश ताचो वापर शस्त्र म्हूण करूंक लागलो जाल्यार कितें जातलें हाचो विचार लेगीत करूंक जावचें ना. म्हणूनच भारतान हे विशीं सादूर रावपाक जाय. भारतांत विदेशांतल्यान येवपी सगल्या इलेक्ट्रॉनीक उपकरणांची तशेंच वस्तूंची 100 टक्के तपासणी जावंक जाय. मोबायल, टॅब्लेट, लॅपटॉप, स्मार्ट वॉच ह्या सारक्या गॅझेट वापरा विशीं सरकारान गायड लायन निश्चीत करची. दरेक नागरिकांक हे विशीं प्रशिक्षण दिवचें. लेबनॉनांत जें जालें तें भारतांत जावचें न्हय हे खातीर सरकारान आतां सावनूच सादूर रावन योग्य ती खबरदारी घेवची. कारण झुजाच्या ह्या नव्या प्रकाराचो घात भारताक चड आसा. भारतान लेबनॉना पसून धडो घेवंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
