भांगरभूंय | प्रतिनिधी
नवी दिल्ली, खबरां संस्था ः चडशा विद्यार्थ्यां खातीर गणित हो एक कठीण विशय. भागाकार, गुणाकार, आदी कारणांक लागून विद्यार्थी गोंदळून वता. आतां नव्या सर्वेक्षणांतल्यान भारत आनी मध्य उदेंतांतले 80 टक्के गणित शिक्षक गणितांत गोंदळतात अशें दिसून आयलां. गुणोत्तर, प्रमाणबद्ध तर्क, बीजगणित, अदमास आनी तर्कशास्त्र ह्यो मुळाव्यो संकल्पना ह्या शिक्षकांक खबर नाशिल्ल्याचें उक्तें जालां.
भारत, युएई, ओमान आनी साउदी अरेबियांतल्या 152 शाळांतल्या 1300 शिक्षकांचें मुल्यांकन केलें.
‘गणित शिक्षकांचें गिन्यान आनी प्राथमीक आनी माध्यमीक गणित संकल्पनांत गैरसमज’ अशें ह्या अभ्यासाचें नांव जावन आसा. शिक्षक प्रभाव कार्यावळी खाला 1,357 शिक्षकांचें गणित विशय गिन्यान-पातळेचें 1 मूल्यमापन केलें. तातूंत शिक्षकांचें विशय, शिक्षणीक गिन्यान, परिक्षक आनी शाळा प्राचार्य सयत हेर तपशील उक्ते जाल्यात. हातूंत भारतांतल्या 80 टक्के, युएईंतल्या 18 टक्के, ओमान आनी साउदी अरेबियांतल्या 1 टक्के शिक्षकांचें मुल्यांकन केलें.
विशेश म्हळ्यार गणिताच्या पेपरांतल्या 50 टक्के प्रस्नांक जाप दितना 75 टक्के शिक्षक गोंदळल्ले. जाल्यार फकत 25 टक्के शिक्षक हे प्रस्न सोडोवंक शकले. गणिताच्या मुळाव्या संकल्पना विशीं 80 टक्के शिक्षक स्पश्ट नाशिल्ल्याचें उक्तें जालें. शिक्षक आनी विद्यार्थ्यां मदीं गणिताची संकल्पना स्पश्ट ना जाल्यार गणित शिक्षणां सांबादी व्हडलें आव्हान आसूं येता अशें अहवालांत म्हणलां.
‘पिसा’ वरवीं शिक्षकांचें मुल्यांकन जाता. तांतूत भारताक 73 मदलो 72वो क्रमांक मेळ्ळा. विद्यार्थी संकल्पना परस फकत पाठ्यपुस्तकांचो अभ्यास करतात अशें कंपनीचे सहसंस्थापक श्रीधर राजगोपालन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
