भांगरभूंय | प्रतिनिधी
अयोध्या, खबरां संस्था ः अयोध्यांतल्या राम मंदिराचे 22 जानेवारी 2024 दिसा उक्तावण जातलें. तेच बरोबर हांगा भारतातली सगळ्यांत व्हडली मशिद जातलीं. हे मशिदीचें नांव मोहम्मद बिन अब्दुल्ला अशें आसतलें. मुंबयचे भाजपा फुडारी हाजी अराफात शेख हांणी शुक्रारा ही म्हायती दिली. तांकां मशीद उदरगत समितीचे अध्यक्ष केल्यात.
संवसारांतले व्हडले कुराण
ही मशीद भारतांतली सगळ्यांत व्हडली मशिद आसतली अशें अराफात शेख हांणी सांगलें. हे मशिदींत 21 फूट उंचायेचो आनी 36 फूट रुंदायेचें संवसारांतलें सगळ्यांत व्हडलें कुराण आसतलें. मशिदीच्या आवारांत कॅन्सर हॉस्पिटल, शाळा, संग्रहालय आनी वाचनालय बांदपाचें आसा. हांगा शिवराक हॉटेल बांदतले. थंय येवपी भोंवडेकारांक फुकट जेवण मेळटलें.
ताजमहाला परस मशिदीची बांदावळ चड सोबीत दिसतली. मशिदींत व्हडले फव्वारे (कारंजीं) बसयतले आनी ते सांजवेळार सुरू जातले. हाचे वांगडा नमाज सुरू जातले. विशेश गजाल म्हणल्यार, हे मशिदींत सगळ्या धर्मांतल्या लोकांक प्रवेश मेळटलो अशें मशीद समितीच्या अध्यक्षान सांगलें.
युपी सरकारान दिली जमीन…
रामजन्मभूमि वादाचेर आपलो निकाल दितना सर्वोच्च न्यायालयान उत्तर प्रदेश सरकाराक धन्नीपूरांत मशिद बांदपा खातीर मुसलमान पक्षाक 5 एकर जमीन दिवपाचो आदेश दिल्लो. अयोध्यांत राममंदिर बांदपा खातीर 5 फेब्रुवारीक ‘श्री रामजन्मभूमि तीर्थ क्षेत्र ट्रस्ट’ स्थापन केलो. त्याच दिसा उत्तर प्रदेश सरकारान अयोध्याच्या रौनाही हांगाच्या धन्नीपूर गांवांत मशिदी खातीर सुन्नी वक्फ मंडळाक 5 एकर जमीन दिली.
सरकारान दिल्ली 5 एकर जमीन मंडळान मान्य केली. ऑक्टोबरांत अयोध्या उदरगत प्राधिकरणाची बसका जाल्ली, तातूंत धन्नीपूर गांवांतल्या मशिदीचे मांडावळीक मान्यताय मेळ्ळी आनी उपरांत सुन्नी केंद्रीय वक्फ मंडळाक मशिदीची मांडावळ दाखयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
