भांगरभूंय | प्रतिनिधी
इंग्लंड आनी भारत ह्या बायलांच्या पंगडां मदीं चालू आशिल्ले वन डे माळेचे दुसरे मॅचींत भारतान 8 बाद 143 धांवड्यो केल्यो. सोफी एक्लेस्टोनान 27 धांवड्यो दिवन 3 विकेटी घेतल्यो. दावखुरी स्पिनर लिन्सी स्मिथान दोन आनी ऑफ स्पिनर चार्ली डिनान एक विकेट मेळयली.
भारता वतीन स्मृती मंधानान सगल्यांत चड धांवड्यो केल्यो. तिणें 51 बॉलांनी 42 धांवड्यांचें योगदान दिलें. जाल्यार दिप्ती शर्मान 34 बॉलांनी नाबाद 30 धांवड्यो करून दुसऱ्या क्रमांकाची उत्कृश्ट कामगिरी केली. ह्या दोगां खेरीत खंयच्याच बेटराक 16चो आंकडो हुपपाक जमलो ना.
ते आदीं चार वरां पावस पडल्या उपरांत मॅच दरेकी 29 ओव्हरींची केली. इंग्लंडाची मुखेलीन टॉस जिखून खेळपट्टीचेर आशिल्ले वलसाणीचो फायदो करून घेवपा खातीर पयलीं भारताक बॅटींग करपाचें आमंत्रण दिलें. तिच्या बॉलरांनी हो निर्णय योग्य थारायलो.
फास्ट बॉलर एम आर्लोटान आपल्या चवथ्या बॉलाचेर प्रतिक्षा रावलाक उत्कृश्ट यॉर्कराचेर बोल्ड केली. पावर प्लेंत भारतान 1 विकेटी व्हगडावन 25 धांवड्यो केल्यो. अशे स्थिती आसतना स्मृती मंधानान लॉरेन बेलाचे बॉलिंगेचेर सेगीत दोन चवके मारले. णववे ओव्हरींत इंग्लंडान डिनाच्या रुपान स्पिनर हाडली. तिणें णव धांवड्यो दिल्यो. पूण, एक्लेस्टोनान 10वे ओव्हरीच्या दुसऱ्या बॉलाचेर हरलीन देओलाक बाद करून भारताक दुसरो धपको दिलो. ते उपरांत एक्लेस्टोनान आपले दुसरे ओव्हरींत हरमनप्रीत कौराक बाद केली. हरमनप्रीतान सात धांवड्यो केल्यो. तिचो बाबत फॉर्म हे मॅचींत लेगीत कायम उरलो. तिणें स मॅचींनी मेळून फकत 89 धांवड्यो केल्यात. हातूंत ताची सर्वोच्च खेळी 26 धांवड्यांची आसा.
15वे ओव्हरींत डिनान जेमिमा रॉड्रिग्साक बाद करून भारताची अवस्था 4 बाद 69 अशी केली. इंग्लंडाक रोखडीच आनीक एक विकेट घेवपाची संद आशिल्ली. पूण, डिनान रिचा घोषाची सोंपी कॅच सोडली. पूण, ही कॅच इंग्लंडाक म्हारग पडूंक ना. एक्लेस्टोनान फुडले ओव्हरींत घोषाक बाद केली.
एके वटेन विकेटी पडत आशिल्ल्यो. पूण, दुसरे वटेन मंधानान स्कोर मुखार व्हरत आशिल्ली.
अखेरेख धांवगती वाडोवपाच्या यत्नांत ती स्मिथाचे बॉलिंगेचेर कॅच बाद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
