भांगरभूंय | प्रतिनिधी
नवी दिल्ली, खबरां संस्था ः भारताच्या सांस्कृतीक आनी तात्विक दायजाक इतिहासीक मान्यताय दिवन श्रीमद् भगवद्गीता आनी भरत मुनींच्या नाट्यशास्त्राचो युनेस्कोच्या ‘मेमरी ऑफ द वर्ल्ड रजिस्टरां’त आसपाव केला. 18 एप्रिलाक संवसारीक दायज दिसा हो आसपाव केलो.
संवसारभरांतल्या दरेका भारतीया खातीर हो एक अभिमानाची खीण अशें प्रधानमंत्री मोदी हांणी ट्विट करून सांगलें. गीता आनी नाट्यशास्त्राचो युनेस्कोच्या मेमरी ऑफ द वर्ल्ड रजिस्टरांत आसपाव जावप ही शाश्वत गिन्यानाची आनी गिरेस्त संस्कृतायेची संवसारीक मान्यताय.
हाचे वांगडा आतां आमच्या देशांतल्या 14 नोंदींचो ह्या युनेस्कोच्या नोंदणींत आसपाव जाला. युनेस्कोचो मेमरी ऑफ द वर्ल्ड रजिस्टर हो युनेस्कोन १९९२ वर्सा सुरू केल्लो एक आंतरराश्ट्रीय उपक्रम आसा. संवसारांतलें म्हत्वाचें माहितीपट, दायजाची वळख पटोवप, ते तिगोवन दवरप आनी उपलब्ध करप हो तांचो हेत आसा.
हो एक आंतरराष्ट्रीय नोंदणी रजीट्रर आसा जातूंत इतिहासीक, संस्कृतीक वा समाजीक म्हत्वाचे इतिहासीक दस्तावेज, हातबरपां, दुर्मीळ पुस्तकां, फोटो, चित्रपट, ऑडिओ रेकॉर्डिंग आदींचो आसपाव आसा. 2024 त संत तुलसीदासाचें रामचरितमानस, पंचतंत्र आनी साहित्य-लोक ह्या तीन भारतीय साहित्यकृतींचोय आसपाव केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
