भांगरभूंय | प्रतिनिधी
ऑक्टोबर 15, 1931 ह्या दिसा तामिळनाडू राज्यांत रामेश्वरम सारख्या पवित्र तिर्थ क्षेत्रांत जैनुलाब्दीन मारकायर हांच्या घरांत अबूल पाकीर जैनुलाब्दीन अब्दुल कलाम नांवचो एकभुरगो जल्माक आयलो. गरीब बापायक मात लेगीत खबर नासलें फुडें वचून हो भुरगो भारताचो राष्ट्रपती जातलो आनी पिपल्स प्रेसिडेंट म्हूण नामना जोडटलो. भौमानेस्त कलामांच्या बापाय कडेन बोट आसली आनी गांवच्या मस्जिदीचे ते इमाम आसले. हिंदू भाविकांक ते आपले बोटीन रामेश्वरम ते धनुषकोडी व्हरून पावयताले आनी आपल्या घराब्याक सांबाळटाले. चार भाव आनी एक भयण हांचे भितर भौ. कलाम घरांत सामके ल्हान. कलाम हांकां शिकपाची खूब आवड आनी उमेद आसली. शाळेंत एक मेहनती शिकपी म्हूण तांची वळख आसली. तांकां गणीत विशय खूब आवडटालो आनी ताचेरूच ते आपलो खूब वेळ घालयताले. शालेय शिकप रामनाथपुरम हांगा पुराय केले उपरांत ते सेंट जोसेफ कॉलेज तिरुचिरापल्ली हांगा तांणी फुडल्या शिकपा खातीर प्रवेश घेतलो.
कॉलेजींत तांकां भौतीक शास्त्र खूब आवडटालें ताका लागून 1954 वर्सा तांणी भौतीक शास्त्रांत पदवी घेतली. 1955 वर्सा मद्रास इन्स्टिट्यूट ऑफ टॅक्नोलोजींत एरोस्पेस अभियांत्रिकीचें शिकप घेवपाक ते मद्रास गेले. एका वयल्या पांवड्याच्या प्रकल्पाचेर काम करतना तांचे प्रगतीक लागून, कॉलेजीचो डीन तांचेर नाखूश आसलो आनी तांकां तांची शिश्यवृत्ती रद्द करपाचो तांकां भंय घातलो. पूण कलाम हांणी तांची अपेक्षा भंग केली. तांणी मुजत पुराय करून प्रकल्प पुराय करून दाखयलो. मागीर डिनान तांकां सागलें की तुमचेर चेपण हाडून हांव तुमकां तुमचो प्रकल्प बरे तरेन पुराय करपाक सांगतालों.
भौ. कलामांक फायटर पायलट जावपाची खूब इत्सा आसली. पूण तें तांचें सपन पुराय जांवक शकलें ना. तांकां पात्रताय फेरयेंत णववी सुवात मेळ्ळी आनी आयएएफाक (Indian Air Force) फक्त आठ सुवातो आसल्यो. 1960 मद्रास इन्स्टिट्यूट ऑफटॅक्नोलोजी ह्या संस्थेंतल्यान पदवी घेतले उपरांत संरक्षण आनी संशोधन आनी विकास सेवा (DRDS) ते वांगडी जाले आनी ते उपरांत संरक्षण संशोधन आनी विकास संस्थेच्या (प्रेस इन्फोरमेशन ब्युरो, भारत सरकार) एरोनोटिकल डेवेलोपमेंट एस्टृब्लिशमेंटांत शास्त्रज्ञ म्हण रुजू जाले. फामाद अंतराळ शास्त्रज्ञ विक्रम साराभाईहांचे देखरेखी खाला आशिल्ल्या INCOSPAR च्या समितिचेय ते भाग आसले. 1969 वर्सा भारतीय अंतराळ संशोधन संस्था (ISRO) हातूंत बदली जाली. 1963 ते 1964 वर्सांनी कलामान व्हर्जिनिया हांगासरल्या हेम्प्टनांतल्या लँगली संशोधन केंद्र, ग्रीनबेल्ट, मेरीलँड मदल्या गोडार्ड स्पेसफ्लाइट सेंटर, आनी वॉलॉप्स फ्लायट सुविधा ह्या संस्थांनी ते भोंवले आनी नियाळ केलो. 1970 ते 1990 च्या दरम्यान पोलर सॅटेलाइट लॉन्च व्हेईकल (PSLV) आनी SLV-III प्रकल्प विकसीत करपाचो यत्न तांणी केलो आनी तांकां येसय मेळ्ळें.
भारताच्यी नागरी अंतराळ कार्यावळींत आनी लश्करी क्षेपणास्त्र विकासाच्या यत्नांक तांचो मोलाचो वांटो आसा. बॅलिस्टीक क्षेपणास्त्र आनी प्रक्षेपण वाहन तंत्रज्ञानाच्या विकासाचेर केल्ल्या कामांक लागून तांका भारताचे मिसायल मॅन म्हणून वळखुपाक लागले. 1998 वर्सा भारताच्या पोखरण 2 च्या अणू चांचण्यां वेळार भौ. कलाम हांणी खूब संयुक्तपणान संघटनात्मक, तंत्रीक आनी राजकी भुमिका बरे तरेन निभायली. 1974 वर्सा केल्ल्या मूळ चांचणी उपरांत ही पयलीच चांचणी भारतांत केल्ली.
सत्ताधारी पक्ष आनी विरोधी पक्ष ह्या दोगांनीय फाटबळ दिल्ल्यान 2002 वर्सा भौ. कलाम भारताचे 11वे राष्ट्रपती जाले. ‘पीपल्सप्रेसिडेंट’ म्हूण तांकां संबोधन करताले. राष्ट्रपती जाले उपरांत कलाम शिक्षण, लेखन आनी सामान्य मनशाच्या जिवीत काडपाक लागले. इंडियन इन्स्टिट्यूट ऑफ मॅनेजमेंट शिलाँग हांगा व्याख्यान दिवपाक गेल्ले कडेन भारतरत्नाचे मानकरी कलाम कोसळ्ळे आनी 27 जुलय 2015 दिसा तांकां काळजाच्या आताकान पिरायेच्या 83 व्या वर्सा मरण आयलें. तांची कूड रामेश्वरम हांगा हाडून शाही राज्य सन्मानान तांचेर निमाणे संस्कार केले.
भौमानेस्त कलाम हांकां म्हजें नमळायेचें नमन.
प्रीता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
