भांगरभूंय | प्रतिनिधी
कोनेरू हम्पी आनी आर वैशाली हांच्या जबरदस्त प्रदर्शनाच्या नेटार भारताच्या बायलांच्या अ पंगडान चेस ऑलिम्पियाडांतले सवे फेरयेंत बळिश्ठ जॉर्जिया पंगडाक 3-1 अशा फरकांनी हारयलो.
उक्त्या गटांत भारताक आदलो वस्ताद अर्मेनिया आड 1.5-2.5 अशा फरकान हार घेवची पडली. तरी ग्रॅण्डमास्टर डी गुकेशाची सातत्यपुर्ण कामगिरी लक्षवेधी थारली. ताणें सेगीत सवें जैत जोडलें. गुकेशान आपल्या प्रदर्शनांत सात्य राखताना गाब्रिएल सर्गिसिआनाक हारयलो. पूण, ताचें जैत भारताक येस मेळोवन दिवपाक उणें पडलें. पंगडांतले हेर वांगडी बी अधिबन आनी रौनक साधवानी हारले.
बायलांच्या गटांत भारताच्या अ पंगडान बळिश्ठ जॉर्जिया पंगडाचें आव्हान सहज परतावन लायलें. ग्रॅण्डमास्टर हम्पीन नाना झाग्रीझेक 42 चालींनी हारयली. ते उपरांत आंतरराष्ट्रीय मास्टर वैशालीन जावाशखिवलीक हारयली. ग्रॅण्डमास्टर द्रोणावली हरिका आनी आंतरराष्ट्रीय मास्टर तानिया सचदेव हांणी आपआपली लडत बरोबरींत सोडयली.
हेर लडतींत उक्त्या गटांत भारत अ पंगडान उझ्बेकिस्ताना आड 2-2 अशी बरोबरी सादली. भारत क पंगडान लिथुयानियाक 3.5-0.5 असो हारयलो. बायलांच्या गटांत भारत ब पंगडान झेक प्रजासत्ताका आडची लडत 2-2 अशी बरोबरींत सोडयली. जाल्यार भारत क पंगडान ऑस्ट्रेलियेच्या पंगडाक 3-1 अशा फरकान हारयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
