भांगरभूंय | प्रतिनिधी
भारतीय दादल्यांचो आनी बायलांचो फुटबॉल पंगडांचो 23 सप्टेंबरा सावन चीनाच्या हांगझूंत सुरू जावपी आशियायी खेळां सर्तींत वांटो घेवपाचो मार्ग मेकळो जालो. ताका चीनांत जावपी आशियायी खेळां सर्तींत वांटो घेवपा खातीर खेळां मंत्रालया कडल्यान विशेश मेकळीक मेळ्ळी.
सध्या आशियायी रॅंकिंगेंत 18वे सुवातेर आशिल्ल्या भारताक 2018त जाल्ले जकार्ता खेळां सर्तींत वांटो घेवपाक मेळूंक नाशिल्लो.
केंद्रीय खेळां मंत्रालयाच्या नेमा प्रमाण जे पंगड आशियायी खंडांत पयल्या आठ रॅंकिगेंत येतात तांकाच आशियायी खेळा सर्तींत वांटो घेवपाक धाडटात. सध्या दादल्यांचो पंगड आशियायी रॅंकिंगेंत 18वे सुवातेर आनी बायलांचो पंगड 11वे सुवातेर आसा. पूण, हे खेपे भारताच्या पंगडाक सर्तींत वांटो घेवपाक विशेश मेकळीक मेळटली अशें खेळां मंत्री अनुराग ठाकूरान सांगलें.
भारताचो दादल्यांचो आनी बायलांचो पंगड आशियायी खेळांत वांटो घेतले. सध्याच्या नेमा प्रमाण ते आशियायी खेळा खातीर पात्र जायनात. पूण, तांणी हालींच जाल्ल्या सर्तींनी केल्ल्या उत्कृश्ट प्रदर्शनाचो विचार करून मंत्रालयान ह्या नेमांत शिथीलताय हाडून आशियायी खेळांत वांटेकार जावपाचो मार्ग मेकळो केला अशें अनुराग ठाकूरान सांगलें.
आशियायी खेळां सर्तीच्या फॉर्मेटा प्रमाण फकत अण्डर 23 पंगड आनी तीन सिनीयर खेळगड्यांक सर्तींत वांटो घेवपाक मेळटा. भारतान निमाणे खेपे 2014 आशियायी खेळांत वांटो घेतिल्लो.
अण्डर 23 पंगडा वांगडा अणभवी खेळगडो आनी मुखेली सुनील छेत्री, स्टार डिफॅण्डर संदेश झिंगन आनी गोलकीपर गुरप्रीत सिंग पंगडाचे वांगडी आसतले. सिनीयर पंगडाचो मुखेल प्रशिक्षक इगोर स्टिमॅक ह्या पंगडाचो प्रशिक्षक आसतलो.
क्रोएशियाच्या इगोराच्या मार्गदर्शनाखाला भारताच्या सिनीयर पंगडान सॅफ चॅम्पियनशीप जिखून भारतान परतून एकदा पयल्या 100त सुवात मेळयला.
मजगतीं, भारतान 1951 आनी 1962तल्या आशियायी खेळां सर्तींत भांगरा पदक जिखलां, जाल्यार 1970त कांश्या पदक मेळोवपाय येस मेळयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
