भांगरभूंय | प्रतिनिधी
भारतीय रिझर्व्ह बँकेच्या आकडेवारींतल्यान स्पश्ट
नवी दिल्ली, खबरां संस्था ः भारताच्या परकी चलनाच्या साठ्यांत 2.98 अब्ज डॉलर वाड जावन 5 एप्रीलाक सगळ्यांत चड 648.56 अब्ज डॉलराचेर पावली अशें भारतीय रिझर्व्ह बँकेन शुक्रारा जाहीर केल्ल्या आकडेवारींत स्पश्ट केले. ताचे फाटल्या सप्तकांत परकी चलनाची साठवण 645.58 अब्ज डॉलर आशिल्ली. भांडवल बाजारांत सध्याची विक्रमी उदरगत आनी परकी संस्थांनी गुंतवणूक करपी डॉलर-पाउंडाची म्हत्वाची येणावळ चालू आशिल्ल्यान भारतीय परकी चलनाचो सांठो उंचायेचे पांवड्यार पावलो. रिझर्व्ह बँके कडेन आशिल्ल्या साठ्यांचें मोल 54.55 अब्ज डॉलर आसा.
ऑक्टोबर 2021 वर्सा देशांतलो परकी चलनाचो सांठो सगळ्यांत चड 645 अब्ज डॉलर जालो. भांडवल बाजारांतली अस्थिरताय, रुपयाचें देंवती कळाव, रशिया- युक्रेन झूज, इझ्राएल- हमास झूज आनी कच्च्या तेलाच्या दरांत व्हड उतार-चडाव आनी परकी संस्थांच्या गुंतवणुकदारां कडल्यान निधी भायर सरप अशा प्रतिकूल घडणुकांक लागून तो उंचेल्या पांवड्यावयल्यान उणो जाल्लो.
परकी साठवण म्हळ्यार कितें?
देशाक वेगवेगळ्या तरांनी उण्या चड प्रमाणांत परकी चलन मेळटा. ताच्या संचयाक परकी साठवण अशें म्हण्टात. रिझर्व्ह बँकेकडेन परकी साठवण मुखेलपणान अमेरिका डॉलर, युरो, पाउंड ह्या रुपांत सांठोवन दवरतात. पूण ही बचत अमेरिकेन आनी हेर देशांनी जारी केल्ल्या सरकारी बॉण्डांत गुंतयतात. जाका लागून ताका व्याजाच्या रुपांत येणावळ मेळटा. पूण उत्पन्न मेळोवप हो मुखेल हेतू न्हय, पूण आणीबाणीच्या वेळार संरक्षणात्मक कवच म्हणून परकी साठ्यांचो देशाचे अर्थवेवस्थेंत म्हत्वाचो वांटो आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
