भांगरभूंय | प्रतिनिधी
आत्मविस्वासान भरिल्लो भारताचो बायलांचो पंगड आयज संयुक्त अरब अमिराता (यूएई) आड जैत जोडून बायलांचे आशिया करंड टी-20 क्रिकेट सर्तीचे सेमी फायनलींतली सुवात निश्चीत करपाक मैदानांत देंवतलो.
सध्याचो वस्ताद भारतान आपले पयले मॅचींत पाकिस्ताना आड 7 विकेटींनी जैत जोडिल्लें.
भारत आनी यूएई ह्या दोनूय पंगडांचेर नदर मारली जाल्यार भारताचेंच दालें जड आसा. तरी, पूण यूएई पंगडाक उणो लेखप भारताक म्हारगूय पडुये.
सध्या भारत दोन गूण आनी +2.29ची नेट रनरेट आसा.
पाकिस्ताना आडचे मॅचींत दिप्ती शर्मा, रेणुका सिंग आनी पुजा वस्त्रकर हांणी उत्कृश्ट बॉलींग केल्ली. पंगड वेवस्थापनाक दाव्या हातान बॉलींग घालपी राधा यादवा कडल्यान बऱ्या प्रदर्शनाची आस्त आसतली. हालींच दक्षीण आफ्रिके आडचे माळेंत तिणें पुनरागमन केल्लें.
ओपनर शेफाली वर्मा आनी स्मृती मंधाना फॉर्मांत आसात, पाकिस्ताना आड तांणी 9.3 ओव्हरींनी 85 धांवड्यांची भागिदारी केल्ली. ते उपरांत भारतान रोखड्योच तीन विकेटी व्हगडायिल्ल्यो.
आयचे मॅचींत मदले फळये कडल्यान बऱ्या प्रदर्शनाची आस्त पंगडाक आसतली. ऑक्टोबरांत बांगलादेशांत संवसारीक टी-20 क्रिकेट सर्त जातली. ताची तयारी करपाचे दिश्टीन आशिया करंड सर्त म्हत्वाची आसा. भारतीय उपखंडांतलें वातावरण लागींलागीं समान आसता, ताका लागून आशिया करंड क्रिकेट सर्त श्रीलंकेंत चालू आसली तरी संवसारीक टी-20चे दिश्टीन म्हत्वाची आसा अशें भारताची रेणुका सिंगान म्हणलें.
भारत : हरमनप्रीत कौर (मुखेली), स्मृती मंधाना, शेफाली वर्मा, जेमिमा रॉड्रिग्स, रिचा घोष, उमा छेत्री, पुजा वस्त्रकर, दिप्ती शर्मा, अरुंधती रेड्डी, रेणुका सिंग, डी हेमलता, आशा शोभना, राधा यादव, श्रेयांका पाटील, संजीवन साजना.
यूएई : एशा रोहीत ओझा (मुखेली), कविशा कुमारी, रितिका रजत, समायरा डी, लावण्या केनी, एमिली थॉमस, हीना होचंदानी, महक ठाकूर, इंदुजा नंदकुमार, रिनिता रजत, खुशी मोहन शर्मा, रिशिता रजत, सुरक्षा कोट्टे, टी सतीश, वैष्णवी महेश.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
