भारताच्या निर्णयान पाकिस्तानाक थरथरो

भांगरभूंय | प्रतिनिधी

– आमी कांयच करूंक ना, भारत सरकारानूच केलां : पाकिस्तानाचो दावो

– सर्वपक्षीय बसकेंत सगल्या पक्षांचो सरकाराचे कृतीक तेंकों

– अमरनाथ यात्रे वेळार उक्तो जावपी पहलगाम मार्ग अंदूं बेगिनूच जालो उक्तो

– टूर ऑपरेटरांनी सरकाराक म्हायती दिनासतनाच बुकींग करून व्हेले पर्यटकांक

भांगरभूंय । प्रतिनिधी

नवी दिल्ली : भारतान पाकिस्तानाची नाकाबंदी करतना राजकी स्ट्रायक केल्या उपरांत सणसणीत मार बशिल्ल्या पाकिस्तानान आमी कांयच करूंक ना असो दावो करीत भारता आड बसका घेवन भारत सरकारान घेतले तशेंच निर्णय जाहीर केले. पाकिस्तानांत आशिल्ल्या भारतीयांनी 24 वरां भितर पाकिस्तान सोडचें. दुतावासांतल्या कर्मचाऱ्यांनी 7 दिसांत भारतांत वचचें. तशेंच भारतीयांचो पाकिस्तानांत येवपाचो व्हिजा रद्द करपाचो निर्णय जाहीर केलो. तशेंच पाकिस्तानान भारतीय विमानांक पाकिस्तानांत प्रवेश बंदी लागू केल्या.

पहलगामांत जें घडलां तातूंत आमचो हात ना. भारतानूच कितें तें केला. थंयचो लोक भारत सरकाराच्या निर्णयांचेर खोशी नाशिल्लो, ताका लागून सगलें घडलें, अशें दावो करीत हात फाफुडपाचो यत्न पाकिस्तानान केलो. ‘सिंधू जल समझोता’ रद्द केल्यार हो झुजाक आमंत्रण दिवपाचो प्रकार आसतलो, अशेंय तांणी म्हणलां.

मजगतीं, भारतीय लश्करान शिमेचेर आतंकवाद्यांक सोदपाची मोहीम नेटान चालीक लायल्या.

दुसरे वटेन सरकारान बिरेस्तारा सर्वपक्षीय बसका आपयल्ली. सगल्या पक्षांनी सरकाराच्या कृतीक तेंको जाहीर केलां. आतंकवादी हल्ल्यांत मरण आयिल्ल्या लोकांक बसकेंत सगल्यांनी आर्गां ओंपलीं.

सुत्रां कडल्यान मेळिल्ले म्हायती प्रमाण संरक्षण मंत्री राजनाथ सिंह हांचे अध्यक्षते खाला ही बसका जाली. दोन वरां चलिल्ले बसकेंत केंद्रीय गृहमंत्री अमीत शाह हांणी ह्या हल्ल्या विशीं म्हायती दिली. हे बसकेक केंद्रीय गृहमंत्री अमीत शाह, संरक्षम मंत्री राजनाथ सिंह भाजपचे राष्ट्रीय अध्यक्ष जे पी नड्डा, केंद्रीय मंत्री किरेन रिजिजू, विदेश मंत्री एस जयशंकर, काँग्रेसीची अध्यक्ष मल्लिकार्जून खरगे, विरोधी पक्ष फुडारी राहुल गांधी, राष्ट्रवादी शरद पवार गटाची खासदार सुप्रिया सुळे, राष्ट्रवादी अजीत पवार गटाचे फुडारी प्रफुल्ल पटेल हाजीर आशिल्ले.

सगळ्या पक्षांच्या फुडाऱ्यांनी ह्या आतंकवादी हल्ल्याचो निशेध केलो. ह्या प्रकरणांत आमी सरकाराच्या दरेके कृतीचें समर्थन करतले, अशें ह्या वेळार उलयतना विरोधी पक्ष फुडारी राहुल गांधी हांणी सांगलें. सुरक्षा वेवस्थेंत नेमकी कसली चूक जाली, हाचेर बसकेंत चर्चा जाली..

बसकेंत उपरांत प्रसार माध्यमां कडेन उलयतना केंद्रीय मंत्री किरेन रिजिजू हांणी ह्या हल्ल्या उपरांत सरकारा कडल्यान आतां मेरेन कसली कारवाय केल्या हाची म्हायती दिली. ही घडणूक खुबूच दुखदिणी आसा. ह्या हल्ल्याक लागून देशांत तिडकीचें ल्हार आसा. ह्या सगळे फाटभुंयेचेर सरकारा कडल्यान खूबशीं म्हत्वाचीं पावलां उखलतात, अशे रिजिजू हांणी म्हणलें.

भारतान एकवटीत जावन आकंतवादा आड लढो दिवपाक जाय, हाचेर बसकेंत सगल्यांचें एकमत जालें. भारतान हे आदींय आतंकवादा आड खर पावलां उखल्ल्यांत आनी हे मुखारूय भारत तें करीत रावतलो. हे बसकेंत सगळ्याच राजकी फुडाऱ्यांनी आतंकवादा आडचे लडायेंत सरकारा वांगडा आशिल्ल्याचें स्पश्ट केलें. सरकार जीं पावलां उखलतले, ताका आमचो पुराय तेंको आसतलो, अशें विरोधी पक्षांच्य फुडाऱ्यांनी आस्वासन दिलां, अशें रिजिजू हांणी सांगलें.

गुप्तचर विभाग (आयबी) आनी गृह मंत्रालयाच्या अधिकाऱ्यांनी घडणूक कशी घडली आनी नेमकी खंय चूक जाली, हे विशीं बसकेंत चर्चा जाली. हो मार्ग चडसो जूनांत अमरनाथ यात्रा सुरू जाले उपरांत उक्तो जाता. कारण अमरनाथ यात्रेचे भावीक हे सुवातेचेर विसव घेतात, पूण अंदूं कांय थळाव्या टूर ऑपरेटरांनी सरकाराक कसलीच म्हायती दिनासतना पर्यटकांचे बुकींग घेवपाक सुरवात केली. तशेंच 20 एप्रील सावन पर्यटकांक थंय व्हरपाक सुरवात केली. हाची म्हायती थळाव्या प्रशासनाक नासली. ताका लागून थंय सुरक्षा वेवस्था तैनात करूंक नासलें, अशें सरकारान म्हणलां. पहलगाम हल्लयांत सुरक्षेंत उणाव आशिल्ले हें केंद्र सरकारान बिरेस्तारा मान्य केलें.