भारताच्या दक्षीण आफ्रिका भोंवडेचें वेळापत्रक जाहीर

भांगरभूंय | प्रतिनिधी

खबरां संस्था
नवी दिल्लीः भारतीय क्रिकेट पंगड ह्या वर्साच्या निमाणे दक्षीण आफ्रिकेचे भोंवडेर वतलो. तिनूय फॉर्मेटाच्यो माळी खेळटलो. भारतीय क्रिकेट नियामक मंडळान पुराय भोंवडेचें वेळापत्रक जाहीर केलां. भोंवडेची सुरवात 10 डिसेंबरच्यान 3 मॅचींच्या टी-20 माळेन जातली. उपरांत 3 मॅचींची वन-डे आनी 2 टॅस्ट मॅचींची माळ जातली.
भारतांत 5 ऑक्टोबराच्यान वन-डे संवसारीक कंरड क्रिकेट सर्त सुरू जातली. 19 नोव्हेंबरांत फायनल जातली. ते उपरांत भारतीय पंगड दक्षीण आफ्रिका भोंवडेर वतलो आनी टी-20 माळेंतली पयली मॅच 10 डिसेंबराक डर्बनांत आनी दुसरी मॅच 12 डिसेंबराक क्युबेरांत खेळटलो. निमणी मॅच 14 डिसेंबराक जोहान्सबर्गच्या स्टेडियमाचेर जातली.
7 डिसेंबरच्यान वन-डे माळेक सुरवात जातली. पयली मॅच जोहान्सबर्ग हांगा आनी दुसरी 19 डिसेंबराक क्युबेरा हांका जातली. 21 डिसेंबराक पर्ल मैदानार तिसरी आनी निमाणी मॅच जातली. संवसारीक टॅस्ट चॅम्पियनशीप चक्रांत भारतीय पंगडाक दक्षीण आफ्रिकेत म्हणल्यार विदेशांत दुसरी टॅस्ट माळ खेळची पडटली. पयली टॅस्ट मॅच 26 डिसेंबरच्यान बॉक्सिंग डेच्या दिसा सेंच्युरियन मैदानार जातली. दुसरी टॅस्ट मॅच  2024 वर्सा 3 ते 7 जानेवारीक मजगतीं केपटावनांत जातली. 2021-22 वर्सा भारतीय पंगड दक्षीण आफिकेचे भोंवडेर गेल्लो तेन्ना टॅस्ट माळेंत 2-1 अशी तांका हार खावची पडिल्ली.