भारताच्या टी-20 नवयुगाची आयच्यान सुरवात

भांगरभूंय | प्रतिनिधी

झिंबाब्वे आड 5 टी-20, नव्या खेळगड्यांचेर निवड समितीचें लक्ष

हरारे : रोहीत शर्मा, विराट कोहली आनी रवींद्र जडेजा ह्या दिग्गज खेळगड्यांनी टी-20 क्रिकेटींतल्यान निवृत्ती जाहीर केल्या उपरांत आनी मोहम्मद शामीय टी-20 क्रिकेटींत खेळपाची शक्यताय उणी आशिल्ल्यान, तशेंच लोकेश राहुल, भुवनेश्वर कुमार ह्या सिनियर क्रिकेटरांक टी-20ची दारां लागीलागीं बंद जाल्ल्यान आतां भारतीय टी-20 क्रिकेटीचे नवयुग सुरू जातां. हाची सुरवात झिंबाब्वे भोंवडें वयल्यान जातां.
झिंबाब्वे आड 5 टी-20 मॅचींचे माळेक आयज सावन सुरवात जाता. शुभमन गिलाच्या फुडारपणा खाला खेळपी यंग ब्रिगेडीचेर निवड समितीची बारीक नदर आसतली. कांय खेळगड्यांचेर फुडाराचो रोहीत शर्मा, विराट कोहली म्हूण नदर आसतली. शुभमन गिलाक कॅप्टनशीप दिवन निवड समितीन बोल्ड पावल उखल्लां. शुभमन गिलाक आपल्या फुडारपणाचे गूण दाखोवन भारताचो फुडलो कॅप्टन जावपा दिकेन पावल मारपाची संद आसा.
तशेंच आयपीएलांत दे दणादण बॅटींग करपी अभिषेक शर्माक रोहीत शर्माची सुवात भरून काडपाच्या नदरेन ह्यो मॅची म्हत्वाच्यो आसात. रोहीत आनी विराट कुशीक सरिल्ल्यान यशस्वी जैसवालाची ओपनर म्हूण वाट मेकळी जाल्या. ताकाय आपली सुवात घड करपाक ही एक बरी संद आसा. शुभमन गिल तिसऱ्या सुवातेर दावो सांगूंक शकता. तशेंच विकेट किपर म्हूण जितेश शर्मा वा ध्रुव ज्युरेल मेळिल्ली संद सोडचोना अशी तांच्या चाहत्यांक आस्त आसा.
झिंबाब्वेची टिम दिसपाक दुर्बळ आसली तरी ती तांच्या देशांत खंयच्याय पंगडाक हारोवंक शकता. सिकंदर रझा, वेस्ली मधेवेरे, ल्युक जोंगवे हें ऑलरावंडर तांची ताकद. जोनाथन कॅंपबेल सारखो बरो बॅट्समॅन तांच्या ताफ्यांत आसा. बॉलींगेंत तेंदाय चतारा, वेलींगटन मसाकाद्जा, फराज अशें बरें पर्याय तांच्या कडेन आसा. तेन्ना तांकां दुर्बळ समजपाची चूक भारताची नवी टिम करचीना, हें मात निश्चीत.
भारताच्या खलील अहमद, आवेश खान हांच्या खातीर फास्ट बॉलींगे खातीर एके तरेची परिक्षाच आसा. चँपियन्स ट्रॉफी, टॅस्ट चँपियनशीपी खातीर जसप्रीत बुमराह फुडली देडेक वर्सां टी-20 क्रिकेटी कडच्यान पयस रावपाक शकता. तेन्ना ताची सुवात घेवपा खातीर ह्या दोगांय कडेन संद आसा.