भांगरभूंय | प्रतिनिधी
इंग्लंड भोंवडेर गेल्ल्या भारताच्या बायलांच्या क्रिकेट पंगडान पयले मॅचींत निर्शेणी हाडपी प्रदर्शन केल्या उपरांत इंग्लंडा आडचे दुसरे टी-20 मॅचींत जैत जोडून माळेंत 1-1 अशी बरोबरी सादली.
पयलीं बॅटींग करतना इंग्लंडान निर्धारीत 20 ओव्हरींनी 6 विकेटी वगडावन 142 धांवड्यो केल्यो. भारतान प्रत्तुत्तर दितना फक्त दोन विकेटी वगडावन 146 धांवड्यो करून 8 विकेटींनी जैत जोडलें.
हे मॅचींत भारताची स्मृती मंधाना पर्जळ्ळी. तिणें जबरदस्त बॅटींग करतना नाबाद 79 धांवड्यांची खेळी केली.
पयली मॅच 9 विकेटींनी वगडायल्या उपरांत भारताक तीन मॅचींचे माळेंतलें आपलें आव्हान कायम राखपाक दुसरी मॅच जिखपाकूच जाय आशिल्ली.
इंग्लंडान टॉस जिखून पयलीं बॅटींग करपाचो निर्णय घेतलो. ताणें 6 विकेटी वगडावन 142 धांवड्यो केल्यो. फ्रेया केम्प हिणें 51 धांवड्यो केल्यो. जाल्यार मायिया बावचियरान 34 धांवड्यांचें योगदान दिलें. ह्या दोगां खेरीत इंग्लंडाच्या एकाय बॅट्समनाक म्हणपा सारकी बॅटींग करपाक जमली ना. भारता वतीन स्नेह राणान तीन, जाल्यार रेणुका सिंग आनी दीप्ति शर्मा हिणें दरेकी एक विकेट घेतली.
143 धांवड्यांचो फाटलाव करतना भारताची सुरवात बरी जाली. पूण, शेफाली वर्मा 20 धांवड्यो करून तंबूंत परतली. ते मेरेन पावर प्लेंत भारताच्यो 55 धांवड्यो जाल्ल्यो. भारताची दुसरी विकेट 77 धांवड्यांचेर पडली. दयालन हेमलता 9 धांवड्यो करून बाद जाली. ते उपरांत दुसरी ओपनर स्मृती मंधाना आनी मुखेली हरमनप्रीत सिंग हांणी एकूय विकेट पडूंक दिवंक ना आनी भारताक 16.4 ओव्हरींनी जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
