भारताच्या चंद्रयान- 4 मिशनाची तयारी सुरू

भांगरभूंय | प्रतिनिधी

श्रीहरीकोटा, खबरां संस्था ः चंद्रयान- 3 च्या येसा उपरांत भारतीय अंतरिक्ष संशोधन संघटनेन चंद्रयान- 4 मिशनाची तयारी सुरू केल्या. आतां मेरेन अमेरिका, चीन आनी रशियेन जें करूंक ना, तें भारत आपल्या चवथ्या चंद्र मिशनान साध्य करपाचो यत्न करतलो. अमेरिकेचे मिशन अपोलो, रशियेचे लुना आनी चीनाचे चांग- ई ही चंद्र मिशनां जाल्यात. भारताचें चवथें चंद्र मिशन एक रोबोटीक मिशन आसतलें. हें विशीं इस्रोन म्हायती दिल्या.
इस्रोन दक्षीण ध्रुवाचेर चंद्रयान- 3 देंवयले. आतां मेरेन खंयच्याच देशान चंद्राच्या दक्षीण ध्रुवाचेर पावल दवरूंक ना. आतां इस्रो चंद्रयान-4 वरवीं हें काम फुडें चालू दवरतलें. ह्या मिशनांतल्यान भारताचें चंद्रयान- 4 चंद्राच्या दक्षीण ध्रुवाचेर देंवतलें. ह्या वाठारांत खड्डे आसात. इस्रोन हे नमुने एकठांय करपाची येवजण आंखल्या. हे नमुने परतून धर्तरेचेर हाडटले. हायड्रोजन, उदक, बर्फ ह्या सारक्या बाष्पशील पदार्थांची नोंद मेळिल्ल्यान हें म्हत्वाचें आसा. अपोलो, लुना आनी चांग ई ह्या मिशनांनी चंद्रांतल्यान नमुने एकठांय करून ते परतून धर्तरेचेर हाडले. पूण स्पेसक्राफ्ट दक्षीण ध्रुवाचेर देंवलें ना. देखून थंयचे नमुने अजून धर्तरेचेर आयिल्ले नात.

चंद्रयान- 4 केन्ना?

चंद्रयान- 4 हें भारताचें चवथें चंद्र मिशन. चंद्रयान-3 तल्या प्रज्ञान रोव्हरा कडल्यान मेळिल्ले म्हायतीचेर आदारुन चवथ्या चंद्र मिशनाची येवजण करतले. चंद्रयान-4 स्पेसक्राफ्ट दक्षीण ध्रुवाचेर देंवल्या उपरांत एक किलोमीटराच्या वाठारांतले नमुने एकठांय करून ते परतून धर्तरेचेर हाडटले. चंद्रयान-3 च्या तुळेंत हें मिशन खूब एडवान्स आसतलें. 2030 वर्सा हें मिशन लॉन्च जावंक शकता. सप्टेंबरांत शुक्र मिशना सयत ह्याय मिशनाक मान्यताय मेळ्ळ्या.

चंद्रयान- 4 त 5 मॉड्यूल

चंद्रयान-4 त 5 मॉड्यूल आसतले, जे वेगवेगळीं कामां करतले. तातूंत प्रोपल्शन मॉड्यूल, डिसेंडर मॉड्यूल, एसेंडर मॉड्यूल, ट्रान्सफर मॉड्यूल आनी रि-एंट्री मॉड्यूल आसतलें. आदल्या मिशनांत फकत तीन मॉड्यूल आशिल्ले. प्रोप्लशन, लँडर आनी रोव्हर. तशेंच चंद्रयान-4 वांगडाच वचपी रोव्हराचें वजन सुमार 350 किलो आसतलें. चंद्रयान-3 वांगडा गेल्ल्या प्रज्ञान रोव्हराचें वजन फकत 30 किलो आशिल्लें.